અમદાવાદ મનપાની અનોખી પહેલ, ગાડીમાં બેઠા બેઠા કરાવો RT-PCR ટેસ્ટ

અમદાવાદ મહાનગરપાલિકાએ નવી પહેલ શરુ કરી છે. જેમાં, લોકો હવેથી ગાડીમાં બેઠા બેઠા RT-PCR ટેસ્ટિંગ કરાવી શકે છે. અમદાવાદ મનપા અને ન્યુબર્ગ સુપ્રાટેક લેબોરેટરીઝના સંયુક્ત ઉપક્રમે પબ્લિક પાર્ટનરશિપના ધોરણે આ પહેલ શરુ કરવામાં આવી છે. જેમાં, કોઇ પણ અપૉઇન્ટમેન્ટ લિધા વિના જ GMDC ગ્રાઉન્ડ ખાતે ટેસ્ટિંગ કરવામાં આવી રહ્યું છે. આ ટેસ્ટિંગ કરાવવાની ફી 800 રૂપિયા રાખવામાં આવી છે.

• GMDC ગ્રાઉન્ડ ખાતે શરૂ કરાઇ ડ્રાઇવ થ્રુ RT-PCR ટેસ્ટ
• મનપા અને ન્યુબર્ગ સુપ્રાટેક લેબોરેટરીઝના PPP મોડેલથી શરુ કરાઈ પહેલ
• લોકો પોતાની ગાડીમાંથી નીચે ઉતર્યા વિના જ કરાવી શકશે ટેસ્ટિંગ

અમદાવાદ:ન્યુબર્ગ સુપ્રાટેક લેબોરેટરીઝના ડિરેક્ટર ડૉ. સંદિપ શાહે ETV ભારતને જણાવ્યું હતું કે, તમામ માહિતી એકઠી કરીને ICMR અને મનપાને આ માહિતી મોકલવામાં આવી રહી છે. સમય જતા જો સેન્ટરની વધું જરુર પડશે તો પણ ઉભા કરવામાં આવશે. તેમજ, અમારી પ્રાયોરિટી સોશિયલ ડિસ્ટનસિંગ જળવાય એ માટેની છે. આ પહેલ ભારતની સૌપ્રથમ પહેલ છે કે, જ્યાં આધુનિક રીતે આવી કોઇ પહેલની શરૂઆત કરવામાં આવી છે. ગાડીમાં બેસીને જ ટેસ્ટિંગ કરાવવાનું હોવાથી કોરોના સંક્રમણની શક્યતાને ધણા અંશે રોકી શકાશે. વળી તમામ માહિતી, ડીજીટલી સ્ટોર થતી હોવાને કારણે કામગીરી ખુબ જ ઝડપથી થઇ રહી છે. ટેસ્ટિંગ થયાના 24 કલાકથી 36 કલાકમાં રીઝલ્ટ વોટ્સએપ, SMS અથવા EMAILથી મળી શકશે.

આ પણ વાંચો:એશિયાની સૌથી મોટી અમદાવાદની સિવિલ હોસ્પિટલની બહાર 108ની લાંબી લાઇનો લાગી

આ રીતે કરાવી શકાશે ટેસ્ટિંગ

કોઇ પણ અપૉઇન્ટમેન્ટ લીધા વિના જે તે વ્યક્તિ સિધા જ GMDC ગ્રાઉન્ડ ખાતે જઇ ટેસ્ટિંગ કરાવી શકશે. આ માટે તેમણે પ્રથમ પ્રવેશ સમયે QR કોડ સ્કેન કરી ફોનથી માહિતી આપવી પડશે. માહિતી અપાઇ ગયા બાદ એક ટોકન નંબર જનરેટ થશે. આ બાદ, ક્યાં કાઉન્ટર ઉપર ટેસ્ટિંગ થશે તેની માહિતી પણ ફોન પર જનરેટ થશે. ત્યારબાદ, સીધા જ કાઉન્ટર ઉપર જઈને ટોકન નંબર બતાવી ટેસ્ટિંગ ચાર્જ ચુકવી ટેસ્ટ કરાવવાનો રહેશે.

આ પણ વાંચો:રાજકોટ સિવિલ હોસ્પિટલ તંત્ર બન્યું પાંગળુ, દર્દીઓની એમ્યુલન્સમાં જ સારવાર શરૂ કરી

ટેસ્ટિંગ માટે કેટલા કાઉન્ટર ઉપલબ્ધ

GMDC ગ્રાઉન્ડ ખાતે 5થી 7 કાઉન્ટર કાર્યરત છે. લોકો વહેલી સવારથી જ લોકો ટેસ્ટિંગ માટે પહોંચી રહ્યા છે. આ પહેલ ડ્રાઇવ થ્રુના નામે ઓળખાઇ રહી છે. પહેલ શરુ થયાના એક જ કલાકમાં મોટી સંખ્યામાં લોકો અહીં પહોંચ્યાં હતા.