- મુખ્યમંત્રી રાહત ફંડમાંથી આર્થિક સહાયનો ચેક પાલક માતા-પિતાને અપાયો
- યોજના અન્વયે માસિક રૂપિયા 3 હજારની સહાયનો હુકમ
- અમદવાદ જિલ્લા કલેક્ટરે બે બાળકોને ચેક એનાયત કર્યો
અમદાવાદ : ગત 4 નવેમ્બરના રોજ અમદાવાદના પીરાણા ખાતે આગ દુર્ઘટનામાં મથુર ચાવડા અને તેમના પત્ની અંજલિ ચાવડા મૃત્યુ પામ્યા હતા. આથી ચાવડા પરિવારનો 8 વર્ષનો દીકરો એલેક્સ અને 13 વર્ષની દીકરી પ્રેઝી અનાથ બન્યા હતા.
રૂપિયા 8 લાખનો ચેક આપવામાં આવ્યો
મુખ્યપ્રધાન વિજય રૂપાણીએ હતભાગી નાગરિકોના વારસદારોને આર્થિક સહાયની જાહેરાત કરી હતી. જે અન્વયે મૃતક દીઠ રૂપિયા 4 લાખ એમ કુલ 8 લાખની રકમ જિલ્લા કલેક્ટર દ્વારા સગીર વારસદારોને રૂબરૂ મળી રકમનો ચેક એનાયત કરવામાં આવ્યો હતો.
બાળકોના નામે ફિક્સ ડિપોઝીટ કરાશે રકમ
આ ઉપરાંત કલેકટર દ્વારા મણીનગર મામલતદારને ઉક્ત બન્ને વારસદારો સગીર હોવાથી આ સહાયની રકમ ફિક્સ ડિપોઝિટ કરવા તથા બાળકો પુખ્ત વયના થાય ત્યારે તેમને આ રકમ મેળવી શકે તે મુજબની વ્યવસ્થા કરવા સૂચના આપવામાં આવી હતી. આ સાથે જ જિલ્લા વહીવટી તંત્ર દ્વારા બન્ને બાળકોને પાલક માતા-પિતા યોજના અન્વયે માસિક રૂપિયા 3 હજારની સહાય મંજૂરીના હુકમ પણ એનાયત કરવામાં આવ્યા હતા.
માસિક સહાય બાળકોના શિક્ષણ પાછળ ખર્ચાશે
આ સમયે અમદાવાદ જિલ્લા કલેક્ટર સંદીપ સાંગલેએ જણાવ્યું કે, પાલક માતા-પિતા યોજના થકી મળતી આર્થિક સહાય બન્ને બાળકોના શિક્ષણ ખર્ચમાં મદદરૂપ થશે. તેમને બન્ને બાળકોની ઉજ્જવળ કારકિર્દી અને ભવિષ્યની કામના કરી હતી.
4 નવેમ્બર -અમદાવાદ આગકાંડઃ ઘટનામાં 12 લોકોના મોત
અમદાવાદ શહેરના પીરાણા-પીપળજ રોડ પર આવેલી કેમિકલ ફેક્ટરીમાં બ્લાસ્ટ બાદ ભયંકર આગ લાગી હતી. જેની જાણ અમદાવાદ ફાયરને થતાની સાથે ઘટનાને પગલે ફાયરબ્રિગેડની 24 જેટલી ગાડી ઘટનાસ્થળે પહોંચી ગઈ હતી. આ ઘટનામાં આસપાસના 9 ગોડાઉનને અસર થઈ હતી. કાપડના ગોડાઉન સહિત 3-4 ગોડાઉનની છત ધરાશાયી થઈ હતી. કુલ 9 ગોડાઉનોમાં 25 જેટલા લોકો ફસાયા હતા. જેમાંથી 11નાં મોત થઈ ગયાં છે. આ દુર્ઘટના અંગે વડાપ્રધાન નરેન્દ્ર મોદીએ પણ ટ્વિટ કરી દુઃખ વ્યક્ત કર્યું છે.
