સામૂહિક આપઘાત પહેલાંના સીસીટીવી મળ્યાં, બાળકો રમતાં-રમતાં મોતના ફ્લેટમાં પહોંચ્યાં

વટવાના સામૂહિક આપઘાતના બનાવથી શહેરમાં ચકચાર મચી ગઇ છે ત્યારે આપઘાત કર્યો તે પહેલાંના પરિવારનાં સીસીટીવી ફૂટેજ સામે આવ્યાં છે. જેમાં બાળકો હસતાંહસતાં 7માં માળે મોતના ફ્લેટમાં જઈ રહ્યાં છે. બાળકોએ તો ક્યારેય વિચાર્યું પણ નહીં હોય કે તેઓ ફ્લેટમાં ગયાં પછી ક્યારેય નીચે પરત નહીં આવે.

અમદાવાદઃ વટવા રીંગ રોડ પાસે આવેલ પ્રયોશા રેસિડેન્સીમાં 2 સગાં ભાઈઓએ પોતાના 4 સંતાનો સાથે આપઘાત કર્યો હતો. મરનાર તમામ સંતાનોની ઉમર 7 થી 12 વર્ષની હતી ,જેમાં 2 દીકરી અને 2 દીકરા હતાં. તેમના પિતા તેમને 17 જૂને ઘરેથી ફરવા જવાનું કહીને ફ્લેટ પર લાવ્યાં હતાં.ફ્લેટમાં આવ્યાં બાદ પણ બાળકો હસતાં અને રમતાં રમતાં લિફ્ટમા બેસીને ફ્લેટમાં ગયાં હતાં.

બાળકો ઉપર ગયા તે બાદ તેમને કોઈ કેફી દ્રવ્ય પીવડાવવામાં આવ્યું હોય તેવી પોલીસને શંકા છે અને કેફી દ્રવ્ય પીવડાવ્યા બાદ બાળકોની હત્યા કરી દેવામાં આવી હોવાનું અનુમાન લગાવવામાં આવી રહ્યું છે. બાળકોને માર્યા બાદ બંને ભાઈઓને જાતે ગળેફાંસો ખાઈ આપઘાત કરી લીધો છે. હાલ પોલીસે આ થીયરીના આધારે આગળની તપાસ હાથ ધરી છે.જો બાળકોની હત્યા કરવામાં આવી હશે તો બંને ભાઈઓ વિરુદ્ધ હત્યાનો ગુનો પણ નોધાશે. હાલ તો બંનેના પરિવાર અને મિત્રોની પૂછપરછ શરૂ કરવામાં આવી છે. મૃતક ભાઈઓને ફ્લેટ અને કારની 7 લાખની લોન હતી પરંતુ લોનના કારણે આપઘાત કર્યો હોવાની વાત પોલીસે નકારી છે.પોલીસે અલગ અલગ પાસાંઓથી વધુ તપાસ હાથ ધરી છે.