અમદાવાદમાં મેઘો મહેરબાન, દક્ષિણ ઝોનમાં 2 કલાકમાં 3 ઇંચ વરસાદ

અમદાવાદ શહેરમાં દિવસ દરમિયાન ઝરમર વરસાદ રાતે મન મૂકીને વરસ્યો છે. શહેરના અનેક વિસ્તારોમાં 2 કલાકમાં 3થી સવા 3 ઈંચ જેટલો વરસાદ પડ્યો છે.

અમદાવાદઃ શહેરમાં દિવસ દરમિયાન ઝરમર વરસાદ રાતે મન મૂકીને વરસ્યો છે. શહેરના અનેક વિસ્તારોમાં 2 કલાકમાં 3થી સવા 3 ઈંચ જેટલો વરસાદ પડ્યો છે. મેમ્કો, નરોડા, કોતરપુર, ઓઢવ, વિરાટનગર, મણીનગર, વટવા, નારોલ સહિતના વિસ્તારોમાં 2 કલાકમાં ત્રણ ઇંચ વરસાદ વરસ્યો છે, જ્યારે ઘાટલોડિયા, સૈજપુર, ઈસનપુર, સરખેજ, રાણીપ, ગોતા, ન્યૂ રાણીપ સહિતના વિસ્તારોમાં 2 ઈંચ વરસાદ થયો છે. ભારે વરસાદને કારણે શાહીબાગ અને મીઠાખળી અંડરબ્રિજ બંધ કરવામાં આવ્યા છે. જો કે, સરેરાશ શહેરમાં 2.5 ઇંચ જેટલો વરસાદ વરસ્યો છે.

આ ઉપરાંત શહેરના પૂર્વ વિસ્તારમાં આવેલા નીચાણવાળા વિસ્તારોમાં પાણી ભરાવવાનું શરૂ થયું છે.

રાજ્યમાં લો-પ્રેશર અને સાઇક્લોનિક સરક્યુલેશન સિસ્ટમ સક્રિય હોવાના કારણે દક્ષિણ ગુજરાત અને મધ્ય ગુજરાતમાં આગામી 48 કલાકમાં ભારેથી અતિભારે વરસાદ પડવાની શક્યતા હવામાન વિભાગ દ્વારા કરવામાં આવી છે. આ ઉપરાંત 18 ઓગસ્ટથી 22 ઓગસ્ટ સુધી રાજ્યમાં અતિભારે વરસાદની આગાહી હવમાન વિભાગ દ્વારા કરવામાં આવી છે.

ઝોન	વરસાદ(ઈંચ)
દક્ષિણ	3
દક્ષિણ-પશ્ચિમ	0.5
ઉત્તર	1.25
મધ્ય	2.5
પશ્ચિમ	1.75
ઉત્તર-પશ્ચિમ	0.5
પૂર્વ	3.5