Stock Market : શેરબજારમાં સાતમાં દિવસે તેજી, સેન્સેક્સ 311 પોઈન્ટ ઉછળી 60,000ની સપાટી કૂદાવી

શેરબજારમાં ફરીથી તેજીનો ટોન જોવા મળ્યો છે. બ્લુચિપ શેરોમાં નવી લેવાલી નીકળી છે અને સપ્તાહના બીજા દિવસે પણ નવી લેવાલી ચાલુ રહી હતી. બીએસઈ સેન્સેક્સ 311.21(0.52 ટકા) વધી 60,000ની સાયકોલોજિકલ સપાટી કૂદાવીને 60,157.72 બંધ રહ્યો હતો. નિફટી ઈન્ડેક્સ 98.25(0.56 ટકા) વધી 17,722.30 બંધ થયો હતો

અમદાવાદ : શેરબજારમાં આજે સતત સાતમાં દિવસે તેજીની આગેકૂચ રહી છે. સેન્સેક્સે 60,000ની અતિમહત્વની સપાટી કૂદાવી દીધી છે અને નિફટી પણ 17,700ની સપાટી વટાવી ગયો છે. આજના ટ્રેડિંગ સેશનમાં બેંકિંગ, મેટલ અને ઓટો સેકટરના શેરોમાં ભારે લેવાલીથી તેજી થઈ હતી. આજના ઉછાળાથી રોકાણકારોની સંપત્તિમાં ફકત એક જ દિવસમાં 1.35 લાખ કરોડનો વધારો થયો છે.

બેંક, મેટલ, ઓટો સેકટરના શેરોમાં નવી લેવાલી : માર્ચ, 2023ને અંકે કંપનીઓના પરિણામ પ્રોત્સાહક આવવાના આશાવાદ પાછળ ભારતીય શેરબજારમાં સતત સાતમાં દિવસે તેજીની આગેકૂચ રહી છે. નવા નાણાંકીય વર્ષમાં બેંક, મેટલ, ઓટો, ઓઈલ એન્ડ ગેસ, પાવર અને ફાઈનાન્સિયલ સેકટરના શેરોમાં નવી લેવાલી ચાલુ રહી હતી. તેની સામે આઈટી અને ટેકનોલોજીના શેરોમાં નફારૂપી વેચવાલીથી ઘટાડો નોંધાયો હતો.

આ પણ વાંચો Sitharaman In Washington:ભારત આવો અને જુઓ, નાણાપ્રધાને નકારાત્મક પશ્ચિમી દેશોને આહવાહન કર્યુ

મિડકેપ અને સ્મોલકેપ શેરોમાં મજબૂતી : રોકડાના શેરોની વાત કરીએ તો મિડકેપ અને સ્મોલકેપ શેરોમાં ધીમી પણ મક્કમ લેવાલી રહી હતી. આજે મિડકેપ ઈન્ડેક્સ અને સ્મોલકેપ ઈન્ડેક્સમાં ક્રમાનુસાર 0.78 ટકા અને 0.40 ટકાની મજબૂતી જોવા મળી હતી.

રોકાણકારોની સંપત્તિમાં 1.35 લાખ કરોડનો વધારો: બીએસઈમાં લિસ્ટેડ કંપનીઓનું કુલ માર્કેટ કેપિટલાઈઝેશન આજે 264.48 લાખ કરોડ રૂપિયા પર પહોંચી ગયું હતું. જે ગઈકાલના ટ્રેડિંગ સેશનમાં એટલે કે સોમવારે 10 એપ્રિલે 263.13 લાખ કરોડ હતું. આમ માર્કેટ કેપિટલાઈઝેશનમાં 1.35 લાખ કરોડનો વધારો થયો છે. એટલે કે આમ આજના માર્કેટની તેજીથી રોકાણકારોની સંપત્તિમાં 1.35 લાખ કરોડનો વધારો થયો હતો.

આ પણ વાંચો 7th Pay Commission : મોંઘવારી ભથ્થું શું છે અને કેવી રીતે થયું શરૂ, જાણો તેના વિશે

સેન્સેક્સમાં 311.21નો ઉછાળો : બીએસઈ સેન્સેક્સ આજે 60,028.60ના ઊંચા મથાળે ખુલ્યો હતો, જે શરૂઆતમાં સામાન્ય ઘટી 59,919.88 થઈ અને ત્યાંથી ઉછળી 60,000ની સપાટી ફરીથી કૂદાવીને 60,267.68 થઈ અને ટ્રેડિંગ સેશનને અંતે 60,157.72 બંધ થયો હતો. જે આગલા બંધ 59,846.51ની સરખામણીએ 311.21(0.52 ટકા)નો ઉછાળો દર્શાવે છે.

નિફટી 98.25 ઉછળ્યો: એનએસઈ નિફટી ઈન્ડેક્સ 17,704.80ના મજબૂત મથાળે ખુલ્યો હતો. શરૂમાં ઘટી 17,655.15 થઈ અને ત્યાંથી ઝડપી ઉછળીને 17,748.75 થઈ અને ટ્રેડિંગ સેશનને અંતે 17,722.30 બંધ થયો હતો. જે આગલા બંધ 17,624.05ની સરખામણીએ 98.25(0.56 ટકા)નો ઉછાળો દર્શાવે છે.

સૌથી વધુ ઊંચકાયેલા શેર : કોટક મહિન્દ્રા(5.04 ટકા), તાતા સ્ટીલ(2.43 ટકા), આઈટીસી(1.90 ટકા), આઈસીઆઈસીઆઈ બેંક(1.65 ટકા) અને મારૂતિ સુઝુકી(1.42 ટકા) રહ્યા હતા.

સૌથી વધુ ગગડેલા શેર: ટીસીએસ(1.50 ટકા), ઈન્ફોસીસ(1.42 ટકા), એચસીએલ ટેકનો(1.41 ટકા), ટેક મહિન્દ્રા(0.83 ટકા) અને એશિયન પેઈન્ટ્સ(0.82 ટકા) રહ્યા હતા.