નવી દિલ્હીઃ સેવા નિવૃત્ત ફંડ ઈપીએફઓએ ગુરુવારે ચાલુ વર્ષ માટે કર્મચારી ભવિષ્ય નિધિ જમા પર 8.5 ટકા વ્યાજ આપવાનો નિર્ણય કર્યો છે. ઈપીએફઓની સાથે 5 કરોડથી વધારે લોકો સક્રિય રીતે જોડાયેલા છે.
કોરોનાના કારણે આ વખતે વ્યાજ દરમાં ઘટાડાનું અનુમાન હતું
સૂત્રો તરફથી મળતી માહિતી અનુસાર, કર્મચારી ભવિષ્ય નિધિ સંગઠન અંતિમ નિર્ણય લેનારી સંસ્થા કેન્દ્રિય ટ્રસ્ટી બોર્ડે ગુરુવારે શ્રીનગરમાં થયેલી બેઠકમાં વર્ષ 2020-21 માટે વ્યાજદર 8.5 ટકા રાખવાનો નિર્ણય કર્યો છે. જોકે, એ પ્રકારની પણ અટકળો હતી કે, ઈપીએફઓ આ વર્ષ 2020-21 માટે ભવિષ્ય નિધિ જમા પર વ્યાજ દરને વર્ષ 2019-20ની 8.5 ટકા દરથી પણ ઓછો કરી શકે છે. વ્યાજ દરમાં ઘટાડાનું અનુમાન કોરોના વાઈરસની મહામારીને ધ્યાનમાં રાખીને કરવામાં આવ્યું હતું. આ સાથે કોરોના કાળમાં કર્મચારીઓના ઓછા યોગદાન અંગે પણ આ અનુમાન લગાવાયું હતું.
આ વર્ષનો વ્યાજ દર વર્ષ 2012-13 પછીથી સૌથી ઓછો
ગયા વર્ષે માર્ચમાં ઈપીએફઓએ વર્ષ 2019-20 માટે ભવિષ્ય નિધિ જમા પર વ્યાજ દર ઘટાડીને 7 વર્ષથી નીચલા સ્તર એટલે કે 8.5 ટકા કરી દીધો હતો, જ્યારે વર્ષ 2018-19માં આ 8.65 ટકા હતું. ઈપીએફ દ્વારા વર્ષ 2019-20 માટે આપવામાં આવેલો 8.5 ટકાનો વ્યાજનો દર એ 2012-13 પછીથી સૌથી ઓછો છે.
