મુંબઈ: ભારતીય સ્ટેટ બેન્ક (એસબીઆઇ) એ શુક્રવારે આધારથી ઑનલાઇન બચત ખાતું ખોલવાની સુવિધા ફરી શરૂ કરી છે. આ સુવિધાનો ઉપયોગ બેન્કના 'યોનો' પ્લેટફોર્મ દ્વારા ડિજિટલ બચત ખાતું ખોલવા માટે થઈ શકશે.
યોનો (યૂ ઑનલી નીડ વન) એ બેન્કની બેન્કિંગ અને જીવનશૈલી સેવાઓ સાથે સંકળાયેલી એકીકૃત સેવા છે.
બેન્કે એક જાહેરાતમાં કહ્યું હતું કે 'ક્વિક સેવિંગ્સ એકાઉન્ટ' ની ઑફર હેઠળ ગ્રાહકને સંપૂર્ણ પેપરલેસ અનુભવ મળશે. આ બચત ખાતા માટે ગ્રાહકે માત્ર પાન નંબર અને આધાર નંબર આપવાનો રહેશે.
બેન્કના ચેરમેન રજનીશ કુમારે જણાવ્યું હતું કે આ ખાતામાં ગ્રાહકને બચત ખાતાની તમામ સુવિધાઓ મળશે. આ માટે, તેમને બેન્ક શાખામાં જવાની પણ જરૂર રહેશે નહીં.
યોનો દ્વારા ક્વિક સેવિંગ્સ એકાઉન્ટ ખોલનારા તમામ ખાતા ધારકોને તેમના નામે રૂપે એટીએમ કમ ડેબિટ કાર્ડ આપવામાં આવશે.