નવી દિલ્હી: ગૃહપ્રધાન અમિત શાહની પહેલ બાદ રમતગમત પ્રધાન અનુરાગ ઠાકુરે વિરોધ કરી રહેલા કુસ્તીબાજો સાથે મુલાકાત કરી હતી. રમતગમત પ્રધાનના આમંત્રણ પર બજરંગ પુનિયા અને સાક્ષી મલિકે અનુરાગ ઠાકુર સાથે મુલાકાત કરી હતી. આ બેઠક બાદ ખેલાડીઓએ પોતાની પાંચ માંગણીઓ રમત પ્રધાન સમક્ષ મૂકી છે.
30મી જૂન પહેલા થશે WFIની ચૂંટણી: કુસ્તીબાજો સાથેની મુલાકાત બાદ રમતગમત પ્રધાન અનુરાગ ઠાકુરે જણાવ્યું હતું કે કુસ્તીબાજો સાથે 6 કલાક લાંબી ચર્ચા કરી. અમે કુસ્તીબાજોને ખાતરી આપી છે કે 15મી જૂન સુધીમાં તપાસ પૂરી થઈ જશે અને ચાર્જશીટ રજૂ કરવામાં આવશે. WFIની ચૂંટણી 30મી જૂન સુધીમાં થશે. રેસલિંગ ફેડરેશનની આંતરિક ફરિયાદ સમિતિની રચના કરવામાં આવશે, જેનું નેતૃત્વ એક મહિલા કરશે. કુસ્તીબાજો સામેની તમામ FIR પાછી લેવી જોઈએ. કુસ્તીબાજોએ એવો પણ અનુરોધ કર્યો હતો કે બ્રિજભૂષણ સિંહ કે જેમણે 3 ટર્મ પૂરી કરી છે અને તેમના સહયોગીઓને ફરીથી ચૂંટવામાં ન આવે. કુસ્તીબાજો 15મી જૂન પહેલા કોઈ વિરોધ નહીં કરે.
પાંચ માંગણીઓ: બ્રિજભૂષણ સિંહની ધરપકડ થવી જોઈએ. બ્રિજભૂષણ સિંહ અને તેમના પરિવારનો કુસ્તી મહાસંઘમાં કોઈ સભ્ય હોવો જોઈએ નહીં. રેસલિંગ ફેડરેશનની ચૂંટણી નિષ્પક્ષ રીતે થવી જોઈએ. કુસ્તીબાજો સામે નોંધાયેલા કેસ પાછા ખેંચવા જોઈએ. મહિલાને કુસ્તી મહાસંઘની પ્રમુખ બનાવવી જોઈએ.
બ્રિજ ભૂષણ સિંહની ધરપકડની માંગ:મીટિંગમાં જતા પહેલા કુસ્તીબાજ સાક્ષી મલિકે સ્પષ્ટ કર્યું હતું કે તેમની મુખ્ય માંગ રેસલિંગ ફેડરેશનના પ્રમુખ બ્રિજ ભૂષણ સિંહની ધરપકડની છે. સિંહ વિરુદ્ધ પોક્સો એક્ટ હેઠળ કેસ નોંધવામાં આવ્યો છે. મહિલા કુસ્તીબાજોનો આરોપ છે કે બ્રિજભૂષણ સિંહે તેમને ખોટી રીતે અને ખોટા ઈરાદાથી સ્પર્શ કર્યો હતો. સિંહ પર ગંભીર આરોપ લગાવનાર સગીરનું નિવેદન ફરી મેજિસ્ટ્રેટ સમક્ષ નોંધવામાં આવ્યું છે.
બ્રિજ ભૂષણ સિંહે આરોપો ફગાવ્યા:બ્રિજ ભૂષણ સિંહે પોતાની પર લાગેલા તમામ આરોપોને નકારી કાઢ્યા છે. બ્રિજ ભૂષણ સિંહે મીડિયામાં નિવેદન આપ્યું હતું કે જો તેમની વિરુદ્ધ પુરાવા રજૂ કરવામાં આવશે તો તેઓ પોતે જ ફાંસી પર લટકશે. તેમના નિવેદન બાદ FIR સાથે જોડાયેલા કેટલાક તથ્યો મીડિયામાં લીક થયા હતા. આ મુજબ બ્રિજ ભૂષણ સિંહે મહિલા રેસલર્સને ખોટી રીતે સ્પર્શ કર્યો હતો.
સરકારની છબીને નુકસાન:મીટિંગમાં ભાગ લેતા પહેલા ખેલાડીઓએ એવી શરત પણ મૂકી હતી કે બંધ દરવાજા પાછળ વાતચીત નહીં થાય. ત્યાં મીડિયાની હાજરી જરૂરી છે. કુસ્તીબાજોના આ પ્રદર્શનને કારણે ક્યાંકને ક્યાંક સરકારની છબીને નુકસાન થઈ રહ્યું છે, તેથી આ પ્રદર્શનને વહેલી તકે સમાપ્ત કરવાના પ્રયાસો કરવામાં આવી રહ્યા છે.
સુપ્રીમ કોર્ટના આદેશ બાદ FIR: આ કેસમાં સુપ્રીમ કોર્ટના આદેશ બાદ FIR નોંધવામાં આવી હતી. દિલ્હી પોલીસે FIR નોંધી છે. પોલીસ ટીમે બ્રિજભૂષણ સિંહના નજીકના મિત્રોની પણ પૂછપરછ કરી છે. પરંતુ હજુ સુધી આ કેસમાં કોઈની ધરપકડ કરવામાં આવી નથી. આને લઈને રેસલર્સ ગુસ્સે છે. રમત પ્રધાને કહ્યું હતું કે કુસ્તીબાજોએ જ એફઆઈઆર નોંધવાની માંગ કરી હતી. આ મામલે પોલીસે કાયદેસરની કાર્યવાહી હાથ ધરી છે. રમતગમત મંત્રીના કહેવા પ્રમાણે, કાયદાકીય પ્રક્રિયા પૂર્ણ થવા દેવી જોઈએ અને ત્યાં સુધી ખેલાડીઓએ વિરોધ ન કરવો જોઈએ. જોકે, ખેલાડીઓએ તેની વિનંતીને ઠુકરાવી દીધી હતી.
- Wrestlers protest: કુસ્તીબાજો અમિત શાહને મળ્યા અને બ્રિજ ભૂષણની ધરપકડની માંગ કરી
- Wrestlers Protest: કુસ્તીબાજોના મુદ્દે અનુરાગ ઠાકુરનું મોટું નિવેદન, ધીરજ રાખવા અપીલ કરી
- Wrestlers' Protest: દિલ્હી પોલીસે સાંસદ બ્રિજભૂષણ શરણ સિંહ સહિત 14 લોકોના નિવેદન નોંધ્યા
