ઉત્તરપ્રદેશ :શહેરમાં અન્ય દેશો અને રાજ્યોના સિમનું વેચાણ થઈ રહ્યું છે. ATSએ શનિવારે શહેરમાં બે આરોપીઓની ધરપકડ કરી હતી, જેઓ ગેરકાયદેસર ટેલિફોન એક્સચેન્જ ચલાવતા હતા. ATS અધિકારીઓને આરોપીઓ પાસેથી 4000થી વધુ પ્રી-એક્ટિવેટેડ સિમ કાર્ડ મળ્યા હતા. આરોપીઓને રિમાન્ડ પર લેવામાં આવ્યા ત્યારે તેઓએ જણાવ્યું કે, કાનપુરમાં ઘણા એજન્ટો સક્રિય છે જેઓ અન્ય દેશો અને રાજ્યોના સિમ કાર્ડ આપતા હતા.
ATSની ટીમ લાગી તપાસમાં : હવે એટીએસ અધિકારીઓએ આવા એજન્ટની કુંડળી તપાસવાનું શરૂ કર્યું છે. ખાસ કરીને જાજમાઉ, ચુન્નીગંજ અને ઝરીબ ચોકીમાં લોકોની પૂછપરછ કરવામાં આવી રહી છે. અહીં બંને આરોપીઓ ગેરકાયદેસર ટેલિફોન એક્સચેન્જ ચલાવતા હતા. જો કે અધિકારીઓની સામે આવા અનેક સવાલો છે, જેના જવાબો શોધવામાં તેમને થોડો સમય લાગશે.
આવી રીતે મોકલતા હતા સિમ : એટીએસ અધિકારીઓને એવી પણ માહિતી મળી છે કે કુરિયર મારફતે શહેરમાં આરોપીઓને સિમકાર્ડના બોક્સ પણ મોકલવામાં આવ્યા હતા. હવે તમામ કુરિયર કંપનીના સંચાલકોની પણ પૂછપરછ કરવામાં આવશે, જેથી એ જાણી શકાય કે સિમકાર્ડ મોકલનારા આ ગેંગમાં કોણ કોણ સામેલ છે? તે જ સમયે, ATSને અત્યાર સુધી મળેલા કુરિયર્સ સંબંધિત દસ્તાવેજોમાં જીટી રોડના રહેવાસી મનીષ શર્મા અને પટનાના રવિ કુમારના નામ બહાર આવ્યા છે. એટીએસ અધિકારીઓને એવી પણ માહિતી મળી છે કે આરોપીઓ મધ્યપ્રદેશ, રાજસ્થાન અને અન્ય રાજ્યોના સિમકાર્ડનો ઉપયોગ કરતા હતા.
અનેક કનેક્શન આવશે સામે : આ ટાસ્કને જોનાર એટીએસના એક ટોચના અધિકારીએ જણાવ્યું કે આ ગેંગનો લીડર નાઝીમ ખાન છે, જે મુંબઈનો રહેવાસી છે. આરોપીઓ પાસેથી તેની ઘણી વિગતો મળી છે. હવે એટીએસ નાઝીમના યુપી કનેક્શનની પણ તપાસ કરશે. નાઝીમ મુંબઈથી રિમોટ એપ્લીકેશન દ્વારા કામ કરતો હતો, તેથી તમામ ઈલેક્ટ્રોનિક સાધનોની તપાસ માટે ફોરેન્સિક ટીમની મદદ લેવામાં આવશે. એટીએસ તેને ખૂબ જ ગંભીરતાથી લઈ રહી છે.
