મોદી સરકારના મોટા નિર્ણય, ટેલીકોમ સેક્ટરમાં 100% FDI, ઑટો સેક્ટર માટે PLI સ્કીમને પણ મંજૂરી

કેન્દ્રીય મંત્રીમંડળે બુધવારે કેટલાક કેબિનેટ નિર્ણયોની જાણકારી આપી. ઘરેલું ઉત્પાદન વધારવા અને રોજગાર પેદા કરવાના ઉદ્દેશ સાથે ઑટોમોબાઇલ ક્ષેત્ર માટે કેબિનેટે 26,058 કરોડ રૂપિયાની સુધારેલ ઉત્પાદન-લિંક્ડ પ્રોત્સાહક (PLI) યોજનાને મંજૂરી આપવામાં આવી છે.

• કેન્દ્રીય મંત્રીમંડળે બુધવારે લીધા મહત્વના કેબિનેટ નિર્ણયો
• 26,058 કરોડ રૂપિયાની PLI સ્કીમને આપી મંજૂરી
• ટેલીકોમ સેક્ટરમાં 100 ટકા FDIને મંજૂરી
• ડ્રોન સેક્ટર માટે 120 કરોડ રૂપિયા મંજૂર

દિલ્હી: કેન્દ્ર સરકારે કોરોના સંકટના કારણે લાંબા સમયથી મુશ્કેલીમાં ચાલી રહેલા ઑટો સેક્ટરને બુધવારના મોટી રાહત આપી છે. સરકારે ઇલેક્ટ્રોનિક વાહનોના ઉત્પાદન, હાઇડ્રોજન ફ્યૂલ વ્હિકલ ઉત્પાદનને પ્રોત્સાહન આપવા માટે પ્રોડક્શન લિંક ઇન્સેંટિવ હેઠળ 26,058 કરોડ રૂપિયા મંજૂર કર્યા છે. ટેલીકોમ અને ડ્રોન સેક્ટરને પણ રાહત આપવામાં આવી છે.

કેન્દ્રિય કેબિનેટની બેઠકમાં આજે આ નિર્ણય લેવામાં આવ્યો છે. કેબિનેટના આ નિર્ણય બાદ ઑટો સેક્ટરમાં સરકારી અનુમાન પ્રમાણે 7.5 લાખ લોકોને નોકરી મળશે. આનાથી દેશમાં ઇલેક્ટ્રિક વાહનોનું ઉત્પાદન વધશે.

ટેલીકોમ સેક્ટરમાં મોટો બદલાવ

કેન્દ્રીય મંત્રી અશ્વિની વૈષ્ણવે જણાવ્યું કે, ટેલીકોમ સેક્ટરમાં 9 મોટા માળખાકીય સુધારા કરવામાં આવી રહ્યા છે. એજીઆરની વ્યાખ્યાને બદલતા આમાંથી બિન ટેલીકોમ રેવેન્યૂને બહાર કરવામાં આવશે. વૈષ્ણવે કહ્યું કે, એડજસમેન્ટ ગ્રોસ રેવેન્યૂ ઘણા સમયથી વિવાદાસ્પદ મુદ્દો રહ્યો છે. આ કારણે આની વ્યાખ્યાને બદલવામાં આવી છે. તેમણે કહ્યું કે, આગળ જે પણ સ્પેક્ટ્રમની નીલામી થશે તેના દ્વારા કંપનીઓને સ્પેક્ટ્રમ રાખવા માટેની પરવાનગી 30 વર્ષ માટે હશે.

100 ટકા FDI

ટેલીકોમ સેક્ટરમાં ઑટોમેટિક રૂટથી 100 ટકા FDIને મંજૂરી આપવામાં આવી છે. આ ઉપરાંત પીએમે એ નિર્ણય લીધો છે કે કસ્ટમરના તમામ કેવાઈસી ફોર્મને હવે ડિજિટલ કરવામાં આવશે. વૈષ્ણવે કહ્યું છે કે આગળથી ટેલીકોમ માટે તમામ પ્રકારની કેવાઈસી ડિઝિટલાઇઝ્ડ હશે અને કોઈપણ પ્રકારના ફોર્મ કે કાગળ લગાવવાની જરૂર નહીં રહે.

જો કે 100% ઓટોમેટિક રૂટ ચીન અને પાકિસ્તાન જેવા દેશોના રોકાણકારોને લાગુ પડશે નહીં. એપ્રિલ 2020માં સરકારે ભારત સાથે જમીન સરહદો વહેંચતા દેશોમાંથી FDI પર નિયમો લાગુ કર્યા હતા. આ પગલું સ્થાનિક વ્યવસાયોના કોઈપણ દુશ્મનીભર્યા કબજાને નિષ્ફળ બનાવવા માટે હતું અને ચીન સાથે સરહદ ઘર્ષણ વચ્ચે આવ્યું હતું.

તમામ લેણાં માટે ચાર વર્ષની મુદત

વૈષ્ણવે જણાવ્યું કે, ટેલીકોમ સેક્ટરને તમામ લેણાં માટે 4 વર્ષનું મોરેટોરિયમ આપવામાં આવશે. એટલે કે તેઓ પોતાનું લેણું 4 વર્ષ સુધી ટાળી શકે છે. આવામાં એજીઆર અને સ્પેક્ટ્રમ તમામ પ્રકારના લેણાં સામેલ થશે, પરંતુ તેમણે આ દરમિયાન વ્યાજ આપવું પડશે. આ વ્યવસ્થા હવેથી લાગું થશે.

ડ્રોન સેક્ટરને પણ પ્રોત્સાહન

કેન્દ્રીય મંત્રી અનુરાગ ઠાકુરે કેબિનેટના નિર્ણયની જાણકારી આપતા કહ્યું કે, ડ્રોન સેક્ટર માટે પણ પીએલઆઈ હેઠળ 120 કરોડ રૂપિયા મંજૂર કરવામાં આવ્યા છે. આનાથી દેશમાં ડ્રોનના ઉત્પાદન અને સંચાલનને પ્રોત્સાહન મળશે.

ઑટો સેક્ટર

અનુરાગ ઠાકુરે જણાવ્યું કે, પીએલઆઈની મદદથી ભારત દુનિયામાં ઑટો માટે મેન્યુફેક્ચરિંગ હબ બની શકશે. આ લાભ ફક્ત એ જ કંપનીઓને મળશે જે રેવેન્યૂ અને ઇન્વેસ્ટમેન્ટની શરતોનું પાલન કરશે. ફોર વ્હીલર કંપનીઓને આગામી 5 વર્ષમાં ઓછામાં ઓછા 2 હજાર કરોડ રૂપિયાનું રોકાણ કરવાનું રહેશે. તેમે વધતા વેચાણના એક ચોક્કસ ટકા સરકાર પ્રોત્સાહન તરીકે આપશે. તેમણે કહ્યું કે, આનાથી ઑટો સેક્ટરમાં આગામી 5 વર્ષમાં 47,500 કરોડ રૂપિયાનું રોકાણ આવશે અને 2.3 લાખ કરોડ રૂપિયાથી વધારેનું ઉત્પાદન થશે.

ઉલ્લેખનીય છે કે ઑટો સેક્ટરની સ્થિતિ ગત વર્ષથી ઘણી ખરાબ છે, જ્યારે દેશમાં કોરોનાના કારણે લોકડાઉન લાગું હતું. ઑગષ્ટ મહિનામાં ઑટો સેક્ટરના વેચાણમાં લગભગ 11 ટકાનો ઘટાડો આવ્યો છે. જો કે જુલાઈમાં વેચાણનો આંકડો સારો હતો.

ટેસ્લાને થશે ફાયદો

નિષ્ણાતોનું કહેવું છે કે સરકારના આ પગલાનો સૌથી પહેલો ફાયદો ઇલેક્ટ્રિક કાર બનાવનારી અમેરિકન કંપની ટેસ્લા ઉઠાવી શકે છે. પીએલઆઈ સ્કીમના પ્રોત્સાહનથી ટેસ્લા ભારતમાં પોતાની પ્રસિદ્ધ ઇલેક્ટ્રિક કારના ઉત્પાદનની શરૂઆત કરી શકે છે. ટેસ્લાએ એ પણ માંગ કરી છે કે ભારત સરકાર ઇલેક્ટ્રિક વાહનો પર આયાત કરમાં કાપ મૂકે. હજુ આના પર સરકાર નિર્ણય લેશે.

ઇન્ડસ્ટ્રીએ કર્યું સ્વાગત

રાહત પેકેજ હેઠળ ઑટોમેટિક ટ્રાન્સમિશન, ઑટોમેટિક બ્રેકિંગ, ઇલેક્ટ્રોનિક સ્ટીયરિંગ સિસ્ટમ જેવા ઑટો કમ્પોનેંટ સેક્ટરને પણ પ્રોત્સાહન મળશે. ઑટો કપનીઓના સંગઠન SIAMએ PLI સ્કીમનું સ્વાગત કરતા કહ્યું છે કે આનાથી ઑટો સેક્ટર વિકાસની નવી ગાથા લખશે. મોદી સરકાર આત્મનિર્ભર ભારત અભિયાન હેઠળ દેશમાં જ મેન્યુફેક્ચરિંગને પ્રોત્સાહન આપવા માટે PLI સ્કીમ હેઠળ અલગ-અલગ સેક્ટરને રાહત આપી રહી છે. સરકારનું લક્ષ્ય છે કે ચીનની માફક ભારત પણ દુનિયામાં મેન્યુફેક્ચરિંગ સેન્ટર બને.

વધુ વાંચો: GSTમાં પેટ્રોલ-ડીઝલને કરવામાં આવી શકે છે સામેલ, 17 સપ્ટેમ્બરના કાઉન્સિલની બેઠક

વધુ વાંચો: સરકારે 10683 કરોડ રૂપિયાની ટેક્સટાઇલ PLI સ્કીમને આપી મંજૂરી, સાડા સાત લાખ લોકોને મળશે રોજગારી