'ગરબા'ને મળી નવી વૈશ્વિક ઓળખ, યુનેસ્કોની અમૂર્ત સાંસ્કૃતિક વારસાની યાદીમાં સમાવેશ

Gujarat's Garba dance UNESCO: યુનેસ્કોની અમૂર્ત સાંસ્કૃતિક વારસાની યાદીમાં ગુજરાતના ગરબા નૃત્યનો સમાવેશ કરવામાં આવ્યો છે. રાજ્યના સીએમ ભુપેન્દ્ર પટેલે આ મામલે પોસ્ટ શેર કરીને જાણકારી આપી હતી.

અમદાવાદ:ગુજરાતના મુખ્ય પ્રધાન ભૂપેન્દ્ર પટેલે બુધવારે જણાવ્યું હતું કે રાજ્યના લોકપ્રિય ગરબા નૃત્યને યુનેસ્કોની ઇન્ટેન્જિબલ કલ્ચરલ હેરિટેજ ઑફ હ્યુમેનિટી (ICH)ની પ્રતિનિધિ યાદીમાં સામેલ કરવામાં આવ્યું છે. નવરાત્રિ ઉત્સવ દરમિયાન સમગ્ર ગુજરાતમાં અને દેશના અન્ય ભાગોમાં યોજાતા ગરબાને યાદીમાં સામેલ કરવા માટે ભારતે નામાંકન કર્યું હતું. ગરબાના સ્વરૂપમાં દેવી માતાની ભક્તિની વર્ષો જૂની પરંપરા જીવંત અને વિકસી રહી છે.

રાજ્યના સીએમ ભુપેન્દ્ર પટેલે X પર લખ્યું કે, 'માઁ આદ્યશક્તિની ભાવભરી ભક્તિના પ્રતીક સમા ગરબાની સદીઓ પુરાણી પરંપરા આજના સાંપ્રત સમયમાં પણ જીવંત રહી છે અને પૂરા તેજ સાથે ખીલી છે. ગુજરાતની ઓળખ સમા ગરબાની @UNESCO દ્વારા 'અમૂર્ત સાંસ્કૃતિક વારસા' તરીકે પસંદગી કરવામાં આવી છે. વિશ્વભરમાં વસેલા ગુજરાતીઓ માટે આ ગૌરવની ક્ષણ છે. માનનીય પ્રધાનમંત્રી શ્રી નરેન્દ્રભાઈ મોદીના નેતૃત્વમાં દેશની વિરાસતને મળેલા મહત્વ અને તેને વિશ્વ સમક્ષ ઉજાગર કરવાના પ્રયાસોનું આ સુખદ પરિણામ છે. ગુજરાતના લોકોને ખૂબ ખૂબ અભિનંદન.

મંગળવારે કસાને, બોત્સ્વાનામાં શરૂ થયેલી અમૂર્ત સાંસ્કૃતિક વારસાની સુરક્ષા માટેની આંતરસરકારી સમિતિની 18મી બેઠક દરમિયાન 2003ના અમૂર્ત સાંસ્કૃતિક વારસાની સુરક્ષા માટેના સંમેલનની જોગવાઈઓ હેઠળ તેને સૂચિમાં સામેલ કરવામાં આવ્યું હતું.

એક સત્તાવાર રીલીઝમાં જણાવાયું છે કે, 'ગુજરાતનું ગરબા નૃત્ય આ યાદીમાં સામેલ થનારી ભારતની 15મી અમૂર્ત સાંસ્કૃતિક ધરોહર છે. આ સિદ્ધિ સામાજિક અને લિંગ સમાવિષ્ટતાને પ્રોત્સાહન આપતી એકીકૃત શક્તિ તરીકે ગરબાની મહત્વપૂર્ણ ભૂમિકાને રેખાંકિત કરે છે.'

યુનેસ્કોની વેબસાઈટ મુજબ, ગરબા એ નવરાત્રીના તહેવાર નિમિત્તે કરવામાં આવતું "કર્મકાંડ અને ભક્તિપૂર્ણ નૃત્ય" છે, જે સ્ત્રીની ઉર્જા અથવા 'શક્તિ'ની ઉપાસનાને સમર્પિત છે.