સુપ્રીમ કોર્ટે તમિલનાડુ રાજ્યપાલને સીએમ સાથે વાત કરવા જણાવ્યું, કહ્યું બિલની હત્યા ન કરી શકાય

તમિલનાડુ વિધાનસભા દ્વારા પસાર કરાયેલા બિલોને મંજૂરી આપવામાં રાજ્યપાલ આરએન રવિ દ્વારા વિલંબ સામે તમિલનાડુ સરકારે સુપ્રીમ કોર્ટમાં અરજી કરી છે. આજની સુનાવણીમાં રાજ્ય સરકારે કોર્ટમાં કહ્યું કે આનાથી સમગ્ર વહીવટ અટકી ગયો છે અને દાવો કર્યો છે કે રાજ્યપાલે પોતાને કાયદેસર રીતે ચૂંટાયેલા લોકો સમક્ષ ' રાજકીય પ્રતિસ્પર્ધી ' તરીકે રજૂ કર્યા છે. ત્યારે સુપ્રીમે રાજ્યપાલને સીએમ સાથે વાત કરવા કહ્યું છે.

નવી દિલ્હી : સુપ્રીમ કોર્ટે શુક્રવારે એટર્ની જનરલ આર વેંકટરમણીને કહ્યું હતું કે તમિલનાડુના મુખ્યપ્રધાન અને રાજ્યના રાજ્યપાલ વચ્ચે ઘણી બાબતો છે જેને ઉકેલવાની જરૂર છે. કોર્ટે કહ્યું કે જો રાજ્યપાલ મુખ્યપ્રધાન સાથે વાત કરે અને મડાગાંઠ ઉકેલે તો કોર્ટ તેની પ્રશંસા કરશે. સુપ્રીમ કોર્ટે કહ્યું કે રાજ્યપાલ કોઈપણ બિલની હત્યા કરી શકે નહીં.

સુપ્રીમે શું કહ્યું :ભારતના મુખ્ય ન્યાયાધીશ ડીવાય ચંદ્રચુડની આગેવાની હેઠળની અને ન્યાયમૂર્તિ જે.બી. પારડીવાલા અને મનોજ મિશ્રાની બનેલી ત્રણ ન્યાયાધીશોની બેન્ચે કહ્યું કે એટર્ની જનરલ શ્રી, અમે ઈચ્છીએ છીએ કે રાજ્યપાલ આ મડાગાંઠ ઉકેલે. અમે એ હકીકતથી વાકેફ છીએ કે અમે ઉચ્ચ બંધારણીય કાર્યકર્તા વિશે વાત કરી રહ્યા છીએ. કલમ 200ના મૂળ ભાગ હેઠળ રાજ્યપાલ પાસે ત્રણ વિકલ્પો છે: તે બિલને સંમતિ આપી શકે છે અથવા તે સંમતિ રોકી શકે છે. અથવા તે અનામત રાખી શકે છે.

સંમતિ અટકાવાઇ છે :આ કિસ્સામાં સીજેઆઈએ કહ્યું કે તમે કહો છો કે નવેમ્બર 2023 તેમણે સંમતિ અટકાવી હતી. હવે એકવાર તેમણે સંમતિ અટકાવી દીધી છે તો પછી તેને રાષ્ટ્રપતિને મોકલવાનો કોઈ પ્રશ્ન નથી. ત્યારે એજીએ જવાબ આપ્યો કે આ એક ખુલ્લો પ્રશ્ન છે અને તેની તપાસ કરવામાં આવશે.

રાજ્યપાલ બિલ રોકી શકતા નથી : સુપ્રીમ કોર્ટે કહ્યું કે રાજ્યપાલ પાસે ત્રણ વિકલ્પ છે. જેને તેમણેે એક પછી એક અનુસરવાનું છે: સંમતિ આપવી, પરવાનગી અટકાવવી અને રાષ્ટ્રપતિને મોકલવી. તેથી, જ્યારે તે સંમતિ અટકાવે છે ત્યારે તે કહી શકતા નથી કે હવે તેને રાષ્ટ્રપતિને મોકલશે. સીજેઆઈએ કહ્યું કે જો આપણે તેને ખૂબ જ બોલચાલની ભાષામાં કહીએ તો તે બિલને ત્યાં રોકી શકે નહીં.

ડિસેમ્બરના બીજા સપ્તાહમાં કેસની વધુ સુનાવણી : વિગતવાર સુનાવણી પછી સુપ્રીમ કોર્ટે ડિસેમ્બરના બીજા સપ્તાહમાં કેસની વધુ સુનાવણી સુનિશ્ચિત કરી હતી. 20 નવેમ્બરના રોજ સુપ્રીમ કોર્ટે તમિલનાડુના રાજ્યપાલ દ્વારા તેમની સંમતિ માટે રજૂ કરાયેલા બિલના નિકાલમાં વિલંબ પર સવાલ ઉઠાવ્યા હતાં. કોર્ટે કહ્યું હતું કે તે બિલો જાન્યુઆરી 2020થી પેન્ડિંગ છે ત્યારે રાજ્યપાલ ત્રણ વર્ષથી શું કરી રહ્યાં હતાં?