કોલકાતા : બંગાળ ગ્લોબલ બિઝનેસ સમિટ (બીજીબીએસ)માં, રિલાયન્સ ઇન્ડસ્ટ્રીઝના ચેરમેન મુકેશ અંબાણીએ મુખ્યમંત્રી મમતા બેનર્જીના નેતૃત્વની પ્રશંસા કરી અને બંગાળમાં 20 હજાર કરોડ રૂપિયાના રોકાણની જાહેરાત કરી. મમતાના દૂરંદેશી નેતૃત્વની પ્રશંસા કરતા અંબાણીએ કહ્યું કે મુખ્યમંત્રી મમતા બેનર્જીના દૂરંદેશી નેતૃત્વ હેઠળ બંગાળમાં રોકાણ માટેનું આદર્શ વાતાવરણ ઊભું થયું છે. રાજ્ય હવે રોકાણ માટેનું સ્થળ બની ગયું છે અને બંગાળ આપણા માટે રોકાણનું બીજું મોટું સ્થળ છે.
રૂપિયા 20,000 કરોડના વધારાના રોકાણની યોજનાઓ જાહેર કરતાં અંબાણીએ જણાવ્યું હતું કે આગામી ત્રણ વર્ષમાં બંગાળમાં રૂપિયા 20,000 કરોડનું રોકાણ કરવાની યોજના છે. તેમણે કહ્યું કે રિલાયન્સે બંગાળમાં અત્યાર સુધીમાં લગભગ 45 હજાર કરોડ રૂપિયાનું રોકાણ કર્યું છે. નવા રોકાણો શિક્ષણ, આરોગ્યસંભાળ અને કૃષિ ક્ષેત્રોને ડિજિટલ બનાવવા પર ધ્યાન કેન્દ્રિત કરશે.
અંબાણીએ પ્રદેશમાં Jioની ટેલિકોમ પહોંચ વધારવા અને બંગાળમાં બાયોએનર્જી ઉત્પાદનમાં રિલાયન્સની ભૂમિકાને પ્રોત્સાહન આપવા પર ભાર મૂક્યો હતો. અંબાણીએ મમતા બેનર્જીની તુલના પૂર્વ વડાપ્રધાન અટલ બિહારી વાજપેયી સાથે કરી અને તેમને 'અગ્નિકન્યા' (ફાયરબ્રાન્ડ) કહ્યા. અંબાણીએ કહ્યું કે અટલ બિહારી વાજપેયીએ તમને યોગ્ય રીતે 'અગ્નિકન્યા' કહ્યા હતા. આ પ્રતિબદ્ધતાઓ સિવાય મુકેશ અંબાણીએ વધુ ત્રણ પહેલની જાહેરાત કરી. આમાં રિલાયન્સ સૌથી પહેલા કાલીઘાટ મંદિરના જીર્ણોદ્ધારમાં ભાગ લેશે. બીજું, રિલાયન્સ માર્ટ બંગાળના હસ્તકલાને પ્રોત્સાહન આપશે અને ત્રીજું, હેન્ડલૂમ ક્ષેત્રના વધુ વિકાસ માટે એક તાલીમ કેન્દ્રની સ્થાપના કરવામાં આવશે.
તેમણે કહ્યું કે રિલાયન્સનું ટેલિકોમ યુનિટ Jio 5Gને રાજ્યના દરેક ખૂણે, ખાસ કરીને ગ્રામીણ વિસ્તારોમાં લઈ જઈ રહ્યું છે. બંગાળના મોટાભાગના વિસ્તારોને તેના કાર્યક્ષેત્રમાં સામેલ કરવામાં આવ્યા છે. Jioનું નેટવર્ક રાજ્યની 98.8 ટકા વસ્તી અને કોલકાતા ટેલિકોમ સર્કલમાં 100 ટકા વસ્તીને આવરી લે છે.
બંગાળની મજબૂત જીડીપી વૃદ્ધિને હાઇલાઇટ કરતાં અંબાણીએ કહ્યું કે રાજ્ય હવે રોકાણ માટે વાઇબ્રન્ટ છે. નારાયણ ગ્રૂપના દેવી પ્રસાદ શેટ્ટી અને અન્ય ઉદ્યોગકારો આગામી બે વર્ષમાં કોલકાતામાં આધુનિક હોસ્પિટલ સ્થાપવા માટે પ્રતિબદ્ધ છે. દરમિયાન, જેક ગ્રૂપના હર્ષ નિયોટિયાએ ડેરી સેક્ટરમાં રોકાણની જાહેરાત કરી, આ પ્રોજેક્ટમાં લગભગ 2,000 લોકોને રોજગારી પૂરી પાડવાની અપેક્ષા છે. તેવી જ રીતે, વિપ્રોના રિષદ પ્રેમજીએ બંગાળમાં લાંબા ગાળાના રોકાણ પ્રત્યેની તેની પ્રતિબદ્ધતાને દર્શાવતા, રાજારહાટમાં દેશનું સૌથી મોટું કેમ્પસ બનાવવા માટે કંપનીની રુચિ વ્યક્ત કરી. આ ઉપરાંત સંજીવ ગોએન્કા, ITC ચેરમેન સંજીવ પુરી અને બંગાળ અંબુજા ગ્રુપના હર્ષ નેવટિયા જેવા ઉદ્યોગ અગ્રણીઓએ બંગાળની ઔદ્યોગિક ક્ષમતા વિશે હકારાત્મક લાગણીઓ વ્યક્ત કરી હતી.
ભૂતપૂર્વ ભારતીય કેપ્ટન અને ભારતીય ક્રિકેટ કંટ્રોલ બોર્ડ (BCCI)ના ભૂતપૂર્વ પ્રમુખ સૌરવ ગાંગુલીને પશ્ચિમ બંગાળના બ્રાન્ડ એમ્બેસેડર તરીકે પસંદ કરવામાં આવ્યા છે. મુખ્યમંત્રી મમતા બેનર્જીએ મંગળવારે બંગાળ ગ્લોબલ બિઝનેસ સમિટ (BGBS) ના મંચ પરથી આ જાહેરાત કરી હતી. મુખ્યમંત્રીએ તાત્કાલિક સ્થળ પર હાજર ગાંગુલીને નિમણૂક પત્ર સોંપ્યો હતો. 2011માં જ્યારે તૃણમૂલ કોંગ્રેસ સત્તામાં આવી ત્યારે પશ્ચિમ બંગાળમાં કોઈ બ્રાન્ડ એમ્બેસેડર નહોતા. મમતા બેનર્જીએ સૌપ્રથમ બોલીવુડ અભિનેતા શાહરૂખ ખાનને સ્ટેટ એમ્બેસેડર તરીકે નિયુક્ત કર્યા કારણ કે ખાન IPL ફ્રેન્ચાઇઝી કોલકાતા નાઇટ રાઇડર્સની સહ-માલિકી ધરાવે છે. જોકે, શાહરૂખના સ્થાને ગાંગુલીને લેવામાં આવ્યો છે કે કેમ તે અંગે કોઈ સત્તાવાર માહિતી નથી. મમતાએ શાહરૂખ ખાનનો મુદ્દો પણ ઉઠાવ્યો ન હતો. અગાઉ મમતાએ તૃણમૂલના સાંસદ અને અભિનેતા દેવને પશ્ચિમ બંગાળના પ્રવાસન એમ્બેસેડર તરીકે જાહેર કર્યા હતા.
ગાંગુલીએ પોતાના ભાષણમાં મુખ્યમંત્રીના વખાણ કર્યા હતા. ગાંગુલીએ કહ્યું, 'જ્યારે પણ તે મને ટેલિવિઝન પર જુએ છે, ત્યારે તે SMS મોકલે છે. જ્યારે મેં મેસેજ કર્યો ત્યારે તેણીએ એક મિનિટમાં જવાબ આપ્યો. દીદી એસએમએસનો જવાબ આપવામાં વિલંબ કરે તે ખૂબ જ દુર્લભ છે. ગાંગુલીએ એમ પણ કહ્યું કે મમતા વ્યક્તિગત સ્તરે કાળજી લઈ રહી છે. ગાંગુલીએ કહ્યું કે રાજ્યમાં ખરેખર રોકાણનું વાતાવરણ ઊભું થયું છે, તમે બધા અહીં આવો.
- રાહુલે પીએમ મોદી માટે 'પનૌતિ' શબ્દનો કર્યો ઉપયોગ, ભાજપ બની આક્રમક
- કેવું હશે ગુજરાત સરકારનું લોકસભા ચૂંટણી લક્ષી બજેટ ? ટેક્સમાં વધારાને લઈને રાજ્ય સરકારે કરી મહત્વપૂર્ણ જાહેરાત
