કોલંબો: શ્રીલંકાના (Economic Crisis In Sri Lanka) રાષ્ટ્રપતિ ગોટાબાયા રાજપક્ષેએ (President Gotabaya Rajapaksa) શુક્રવારે દેશમાં કટોકટીની સ્થિતિ જાહેર કરી છે. ગંભીર નાણાકીય કટોકટીનો સામનો કરી રહેલા લોકોએ ગુરુવારે રાષ્ટ્રપતિના ખાનગી નિવાસસ્થાન પાસે બેરિકેડ પર હુમલો કર્યો અને વાહનોને આગ લગાવી દીધી. બગડતી પરિસ્થિતિને જોતા ઈમરજન્સી જાહેર કરવામાં આવી છે. આ નિર્ણયથી સેનાને અમર્યાદિત શક્તિ મળી છે, જે કોઈપણ પ્રકારના હિંસક પ્રદર્શનને રોકવામાં મદદ કરશે.
શ્રીલંકા ગંભીર આર્થિક સંકટમાં : એક ગેઝેટ પણ બહાર પાડવામાં આવ્યું છે. વાસ્તવમાં શ્રીલંકા ગંભીર આર્થિક સંકટમાંથી પસાર થઈ રહ્યું છે. સ્થિતિ એટલી ખરાબ થઈ ગઈ છે કે લોકો રસ્તા પર આવી ગયા છે. મોટી સંખ્યામાં વિરોધીઓએ રાષ્ટ્રપતિ ગોટાબાયા રાજપક્ષેના આવાસની બહાર તેમના રાજીનામાની માંગ સાથે પ્રદર્શન કર્યું. આ દરમિયાન ગુસ્સે ભરાયેલા લોકોએ અનેક વાહનોને આગ ચાંપી દીધી હતી.
આ પણ વાંચો:રશિયાના વિદેશ પ્રધાને વડાપ્રધાન મોદી સાથે કરી મુલાકાત
રાષ્ટ્રપતિના નિવાસસ્થાન પાસે બેરિકેડ્સ પર દરોડા :દેશમાં ઈમરજન્સી જાહેર થયા બાદ સેનાને તૈનાત કરવામાં આવી છે અને હવે તેની પાસે વોરંટ વિના શંકાસ્પદ લોકોની ધરપકડ કરવાની સત્તા છે. મીડિયા રિપોર્ટ્સ અનુસાર ગોટાબાયા રાજપક્ષેએ કહ્યું કે આ પગલું ભરવું જરૂરી હતું. તેમણે કહ્યું કે આ જાહેર સુરક્ષાને ધ્યાનમાં રાખીને, શાસન જાળવવા અને આવશ્યક સેવાઓના સરળ સંચાલન માટે કરવામાં આવ્યું છે. પરિસ્થિતિને કાબૂમાં લેવા માટે કડક કાયદાઓ અમલમાં મૂકવામાં આવ્યા હતા. આ નિર્ણયથી સુરક્ષા દળોને હિંસક પ્રદર્શનને રોકવામાં મદદ મળશે.
સરકારે હિંસક ઘટનાને 'આતંકવાદી કૃત્ય' ગણાવ્યું : શ્રીલંકાની સરકારે રાષ્ટ્રપતિના નિવાસસ્થાન નજીકની હિંસક ઘટનાને 'આતંકવાદી કૃત્ય' ગણાવી. શ્રીલંકાના ઘણા મંત્રીઓએ આ માટે વિપક્ષી પાર્ટીઓ અને તેમની સાથે જોડાયેલા ઉગ્રવાદી તત્વોને જવાબદાર ઠેરવ્યા હતા. આ ઘટનાને ગુપ્તચર તંત્રની નિષ્ફળતા ગણાવીને એક મંત્રીએ રાષ્ટ્રપતિના જીવને ખતરો ગણાવ્યો હતો. તે જ સમયે, તમિલ નેશનલ એલાયન્સના શ્રીલંકાના સાંસદ શિવગનમ શ્રીધરનનો આરોપ છે કે સરકાર આપત્તિ આવવાની રાહ જોઈને બેઠી હતી. હવે રાજપક્ષે સરકાર કોવિડ-19 પર પોતાની નિષ્ફળતાનો આરોપ લગાવવાનો પ્રયાસ કરી રહી છે. ગુરુવારે મોડી રાત્રે રાજપક્ષેના નિવાસસ્થાનની બહાર મોટી સંખ્યામાં લોકો એકઠા થયા હતા અને રાષ્ટ્રપતિને હટાવવાની માંગ સાથે સરકાર વિરોધી સૂત્રોચ્ચાર કર્યા હતા. પરિસ્થિતિને સંભાળવા માટે ટીયર ગેસ અને હળવા બળનો ઉપયોગ કરવામાં આવ્યો હોવાનું કહેવાય છે. આ દરમિયાન અનેક પોલીસકર્મીઓ ઘાયલ થયા હતા.
શ્રીલંકામાં આર્થિક કટોકટી : શ્રીલંકામાં મોટી આર્થિક કટોકટી માટે સરકારને જવાબદાર માને છે. લોકો માને છે કે સરકારની ખોટી નીતિઓને કારણે આર્થિક વ્યવસ્થા પડી ભાંગી છે. આ તમામ કારણોસર લોકો જગ્યાએ જગ્યાએ સરકારનો વિરોધ કરી રહ્યા છે. જો કે, સરકારે આ વાતને નકારી કાઢી અને તેને વિપક્ષી પાર્ટીઓનું ષડયંત્ર ગણાવ્યું. વિશ્લેષકોએ કટોકટી માટે અર્થતંત્રના ગેરવહીવટને જવાબદાર ઠેરવ્યું છે. આ આર્થિક સંકટ કોવિડ-19 મહામારી દરમિયાન શરૂ થયું હતું. આ દરમિયાન ઉદ્યોગો અને ધંધાઓ પડી ભાંગ્યા હતા. પ્રવાસન ક્ષેત્ર ઠપ્પ થઈ ગયું. મોટી સંખ્યામાં લોકો બેરોજગાર બન્યા છે. આ બધા કારણોને લીધે દેશની આર્થિક સ્થિતિ સતત કથળતી રહી.
આ પણ વાંચો:PM મોદીને બોંબથી ઉડાવી દેવાની મળી ધમકી, NIAને મળ્યો ઈ-મેલ
શ્રીલંકા ભયંકર આર્થિક સંકટમાં :શ્રીલંકા ભયંકર આર્થિક સંકટમાં છે. આ અંશતઃ વિદેશી વિનિમયની અછતને કારણે છે, જેનો ઉપયોગ ઇંધણની આયાત માટે ચૂકવણી કરવા માટે થાય છે. કલાકદીઠ વીજકાપ, ઈંધણ, ખોરાક અને દવાઓના અભાવે લોકોનો રોષ ફાટી નીકળ્યો છે. શ્રીલંકામાં લોકો દરરોજ 10 થી 15 કલાક વીજ કાપનો સામનો કરી રહ્યા છે. જેની અસર ઉદ્યોગોને પડી છે. ઈંધણની તીવ્ર અછત છે. લોકોને જરૂરી દવાઓ મળી રહી નથી. સાથે સાથે મોંઘવારી પણ દિવસેને દિવસે વધી રહી છે જેના કારણે લોકોનું જીવન મુશ્કેલ બની ગયું છે.
