નવી દિલ્હીઃ જવાહરલાલ નેહરુ યુનિવર્સિટીમાં વાઈસ ચાન્સેલરની છેલ્લા ઘણા મહિનાઓથી ચાલી રહેલી શોધનો આજે અંત આવ્યો છે. પ્રોફેસર શાંતિશ્રી ધુલીપુડી પંડિતને વાઇસ ચાન્સેલર તરીકે નિયુક્ત કરવામાં (Shantishree Pandit Vice Chancellor of JNU) આવ્યા છે. આ અંગે શિક્ષણ મંત્રાલય દ્વારા આદેશ જારી કરવામાં આવ્યો છે. આ સાથે ETV BHARATના સમાચારને પણ સમર્થન મળ્યું છે. ETV BHARATએ તાજેતરમાં જણાવ્યું હતું કે, જવાહરલાલ નહેરુ યુનિવર્સિટીના ઈતિહાસમાં પ્રથમ વખત કોઈ મહિલા વાઇસ ચાન્સેલર બની શકે છે.
પ્રો. શાંતિશ્રી પંડિત બન્યા JNUના નવા વાઇસ ચાન્સેલર, રહી ચૂક્યા છે JNUના વિદ્યાર્થી આ પણ વાંચો:દિલ્હી સરકાર દ્વારા જાહેર થયેલી નવી શિક્ષણ નીતિનું JNU કુલપતિએ કર્યું સ્વાગત
શાંતિશ્રી પંડિત મહારાષ્ટ્રની પૂણે યુનિવર્સિટીમાં પ્રોફેસર છે
પ્રોફેસર શાંતિશ્રી ધુલીપુડી પંડિત હાલમાં મહારાષ્ટ્રની પૂણે યુનિવર્સિટીમાં પ્રોફેસર (Professor at Pune University) તરીકે કામ કરી રહ્યા છે. શિક્ષણ મંત્રાલય દ્વારા જારી કરાયેલા આદેશ અનુસાર તેમનો કાર્યકાળ 5 વર્ષનો રહેશે. પ્રોફેસર શાંતિશ્રી પંડિતે જવાહરલાલ નેહરુ યુનિવર્સિટીની સ્કૂલ ઓફ ઈન્ટરનેશનલ સ્ટડીઝમાંથી MPhil અને PHD કર્યું છે. જ્યાં તેણે MPhilમાં યુનિવર્સિટીમાં પ્રથમ સ્થાન મેળવ્યું હતું. બીજી તરફ વાઈસ ચાન્સેલર પ્રોફેસર એમ. જગદીશ કુમારે પ્રોફેસર શાંતિશ્રી ધુલીપુડી પંડિતની નિમણૂક બદલ શુભેચ્છાઓ પાઠવી છે.
વાઈસ ચાન્સેલરના પદ માટે 27 ઓક્ટોબર 2020ના રોજ અરજીઓ મંગાવી
જવાહરલાલ નેહરુ યુનિવર્સિટીના વાઇસ ચાન્સેલર પ્રોફેસર એમ. જગદીશ કુમારનો કાર્યકાળ 26 જાન્યુઆરી 2021ના રોજ સમાપ્ત થયો. 23 જાન્યુઆરી 2021 ના રોજ શિક્ષણ મંત્રાલય દ્વારા તેમની નિમણૂક ન થાય ત્યાં સુધી આ પદ પર કામ ચાલુ રાખવાનો આદેશ જારી કરવામાં આવ્યો હતો. ઉલ્લેખનીય છે કે, વાઈસ ચાન્સેલરના પદ માટે 27 ઓક્ટોબર 2020ના રોજ અરજીઓ મંગાવવામાં આવી હતી. આ ઉપરાંત, એક વર્ષ પછી 2 ઓક્ટોબર, 2021 ના રોજ JNUના વાઇસ ચાન્સેલરશિપ માટે મંત્રાલય પાસેથી ફરીથી અરજીઓ માંગવામાં આવી હતી. અરજી કરવાની છેલ્લી તારીખ 11 ઓક્ટોબર નક્કી કરવામાં આવી હતી. પ્રોફેસર એમ. જગદીશ કુમારને યુનિવર્સિટી ગ્રાન્ટ કમિશનના અધ્યક્ષ તરીકે નિયુક્ત કરવામાં આવ્યા છે.
આ પણ વાંચો:JNUના વિદ્યાર્થીએ ભારતીય સૈન્ય વિરુદ્ધ ટ્વિટ કરતા ફરિયાદ નોંધાઈ
દિલ્હીની બે યુનિવર્સિટીઓમાં વાઈસ ચાન્સેલર તરીકે મહિલાઓ
જવાહરલાલ નેહરુ યુનિવર્સિટીમાં પ્રોફેસર શાંતિશ્રી પંડિતને વાઇસ ચાન્સેલર તરીકે નિયુક્ત કરવાના આદેશ બાદ જ હવે દિલ્હીની બે કેન્દ્રીય યુનિવર્સિટીઓમાં વાઈસ ચાન્સેલર તરીકે મહિલાઓ કામ કરી રહી છે. આ પહેલા જામિયા મિલિયા ઇસ્લામિયામાં પ્રોફેસર નજમા અખ્તરે સેન્ટ્રલ યુનિવર્સિટીમાં પ્રથમ મહિલા વાઇસ ચાન્સેલરનો દરજ્જો પ્રાપ્ત કર્યો હતો.
