- ગર્ભવતી મહિલાના ખભા પર તેના દિયરને બેસાડીને 3 કિમી સુધી ચલાવાઈ
- ગર્ભવતી મહિલાને ક્રિકેટ બેટ મારતા મારતા ચલાવાઈ
- પોલીસે સાસરીયાના લોકો વિરુદ્ધ હુમલાની કલમો હેઠળ ગુનો નોંધ્યો
મધ્યપ્રદેશ: ગુના જિલ્લાના સિરસી પોલીસ સ્ટેશનમાં એક મહિલા ખભા પર દિયરને બેસાડીને 3 કિલોમીટર સુધી ચાલવાનો સનસનીખેજ મામલો પ્રકાશમાં આવ્યો છે. ઘટના જિલ્લાના સિરસી પોલીસ સ્ટેશન હેઠળ બની હતી. આ સમય દરમિયાન મહિલાને ક્રિકેટ બેટથી માર પણ મારવામાં આવ્યો હતો. આ ઘટનાના વીડિયોઝ અને ફોટો સોશિયલ મીડિયા પર વાયરલ થયા છે. આ ઘટના મહિલાના પૂર્વ સાસરીયાઓ દ્વારા બની હોવાનું જણાવાયું છે. જો કે, પોલીસે આ કેસમાં હુમલાની કલમો હેઠળ ગુનો નોંધ્યો છે. જેમાં ચાર લોકો પર આરોપ મૂકવામાં આવ્યા છે.
પતિને છોડીને અન્ય યુવક સાથે રહેતી હતી મહિલા
ઘટના બમૌરી વિધાનસભા ક્ષેત્રના ગ્રામ પંચાયત સ્થિત દગડફલા ગામની છે. જ્યાં ભીલ સમાજના મહિલાના પ્રથમ લગ્ન બાંસખેડીમાં રહેતા યુવક સાથે થયા હતા, બાદમાં તે બીજા યુવક સાથે રહેવા લાગી હતી. આ અંગે મહિલાએ કહ્યું કે, તેના પતિએ તેને છોડી દેવાની વાત કરી હતી, તેથી તે બીજા યુવક સાથે રહેવા લાગી હતી. તે અને પેલો યુવાન લગભગ એક મહિનાથી પતિ અને પત્ની તરીકે રહેતા હતા. જ્યારે તેના પૂર્વ સાસરિયાઓને માહિતી મળી ત્યારે તેના સાસરા, જેઠ સહિત લગભગ આઠ લોકો તેના ઘરે આવ્યા હતા.