વડાપ્રધાન નરેન્દ્ર મોદી દ્વારા રસીકરણ અભિયાનનો શુભારંભ

રસીકરણ અભિયાનનાં પ્રથમ દિવસે ત્રણ હજાર કેન્દ્રો કાર્યરત રહેશે. પ્રત્યેક કેન્દ્રમાં એક સત્ર દરમ્યાન માત્ર 100 લોકોને રસી અપાશે. રસીકરણમાં ફ્રન્ટલાઈન વૉરિયર્સને પ્રાધાન્ય આપવામાં આવશે.

• તમામ રાજ્યોનાં 3000થી વધુ કેન્દ્રોને ડિજીટલ માધ્યમથી કનેક્ટ કરાશે
• રસીકરણને લગતા કોઈપણ પ્રશ્નના સમાધાન માટે 1075 હેલ્પલાઈન શરૂ
• પ્રથમ દિવસે રસીકરણ કેન્દ્રો પર ફ્રન્ટલાઈન વૉરિયર્સને રસી અપાશે

નવી દિલ્હી: દેશમાં દરરોજ કોરોના વાઈરસનાં કેસોમાં સતત ઘટાડો નોંધાઈ રહ્યો છે. કોરોના સંક્રમણને હરાવવા માટેનો અંતિમ ઉપાય રસીકરણ જ છે. દેશમાં રસીકરણ માટેની તમામ તૈયારીઓ પૂર્ણ થઈ ગઈ છે. ત્યારે આજે એટલે કે શનિવારે સવારે 10:30 કલાકે વડાપ્રધાન નરેન્દ્ર મોદી રસીકરણનાં રાષ્ટ્રવ્યાપી અભિયાનની શરૂઆત કરાવશે.

રસીકરણ માટેની તમામ તૈયારીઓ પૂર્ણ
વડાપ્રધાન કાર્યાલયે જણાવ્યું છે કે, આવતીકાલે કોવિડ-19નાં રસીકરણ દરમ્યાન વડાપ્રધાન દ્વારા તમામ રાજ્યો અને કેન્દ્રશાસિત પ્રદેશોમાં 3000થી વધુ સ્થળોને ડિજીટલ માધ્યમથી કનેક્ટ કરવામાં આવશે. દેશનાં તમામ રાજ્યો અને કેન્દ્રશાસિત પ્રદેશોને રસી મોકલી દેવાઈ છે. આ ઉપરાંત રસીકરણને લગતા પ્રશ્નોનાં નિકાલ માટે 24 કલાક કાર્યરત હેલ્પલાઈન 1075 શરૂ કરી દેવાઈ છે.

5 હજારથી વધુ કેન્દ્રો પર રસીકરણનું આયોજન
નીતિ આયોગનાં સભ્ય વી.કે પોલે જણાવ્યું હતું કે, રસીકરણ અભિયાન પ્રથમ દિવસે દેશનાં 3 હજાર કેન્દ્રો પર શરૂ કરવામાં આવશે. એક સત્રમાં માત્ર 100 લોકોને રસી આપવામાં આવશે. જેમ જેમ આ કાર્યક્રમ આગળ વધશે, તેમ તેમ કેન્દ્રોની સંખ્યા વધારીને 5 હજારથી વધુ કેન્દ્રો પર રસીકરણનું આયોજન છે.

'કો-વિન' એપ્લિકેશનમાં રજીસ્ટ્રેશન ફરજિયાત રહેશે
શરૂઆતમાં માત્ર હેલ્થકેર વર્કર્સને રસી આપવામાં આવનાર છે. ત્યારે આરોગ્ય વિભાગ દ્વારા રસીકરણ કેન્દ્રો માટે જાહેર કરાયેલી સૂચના મુજબ, હેલ્થકેર વર્કર્સમાં માત્ર ડૉક્ટરો અને નર્સો જ નહિ, પરંતુ હોસ્પિટલોમાં કામ કરનાર સફાઈ કર્મીઓ, એમ્બ્યુલન્સ ડ્રાઈવરોનો પણ સમાવેશ થાય છે. જોકે, રસી મેળવવા માટે તમામે 'કો-વિન' એપ્લિકેશનમાં ફરજિયાત રજીસ્ટ્રેશન કરાવવાનું રહેશે.