નવી દિલ્હી: નેશનલ પેમેન્ટ્સ કોર્પોરેશન ઓફ ઈન્ડિયા (NPCI) દ્વારા તૈયાર કરવામાં આવેલ ડિજિટલ પેમેન્ટ સોલ્યુશન ઇ-રૂપી (e-Rupi)નું આજે સોમવારે સાંજે 4:30 કલાકે વડાપ્રધાન મોદી (PM Modi) એ વીડિયો કોન્ફરન્સિંગના માધ્યમથી લોકાર્પણ કર્યું હતું.
શું છે e-Rupi ?
NCPI દ્વારા તૈયાર કરવામાં આવેલ ઇ-રુપી (e-Rupi) એ પ્રીપેઈડ વાઉચર છે. જેના થકી કેશલેસ અને કોન્ટેક્ટલેસ પેમેન્ટ કરી શકાશે. ઇ-રૂપી એ ક્યૂઆર કોડ તેમજ એસએમએસ સ્ટ્રિંગ આધારિત ઇ-વાઉચર છે. જે લાભાર્થીના મોબાઇલ સાથે કનેક્ટેડ હશે. તેની ખાસિયત એ છે કે, વપરાશકર્તાઓ કાર્ડ, ડિજિટલ પેમેન્ટ એપ્લિકેશન અથવા તો ઈન્ટરનેટ બેન્કિંગનો ઉપયોગ કર્યા વિના પૈસાની ચૂકવણી કરી શકશે. e-Rupi ને લગતી અન્ય તમામ માહિતી મેળવવા માટે, Click Here
શરૂઆતમાં માત્ર સ્વાસ્થ્ય સેવાઓ સાથે જ જોડાણ
ઇ-રૂપી (e-Rupi) લોન્ચ કર્યા બાદ વડાપ્રધાન મોદીએ જણાવ્યું હતું કે, હાલમાં તેને માત્ર સ્વાસ્થ્ય સંબંધિત સેવાઓ સાથે જ જોડવામાં આવી રહ્યું છે. પ્રારંભિક તબક્કે પૈસા ખર્ચીને વેક્સિન મેળવવા ઈચ્છતા લોકો તેનો લાભ લઈ શકશે. જ્યારબાદ તેનો ઉપયોગ અન્ય આરોગ્યલક્ષી સેવાઓ માટે ચૂકવણી કરવામાં પણ કરી શકાશે.