Eight Indians Detained in Qatar: કતારમાં મૃત્યુદંડની સજા પામેલા નેવીના 8 એક્સ ઓફિસર્સના પરિવારને જયશંકર રુબરુ મળ્યા

પરિવારને મળવા પહોંચેલા એસ. જયશંકર જણાવે છે કે ભારત સરકાર આ મુદ્દાને ગંભીર ગણીને કાર્યવાહી કરી રહી છે. વાંચો એસ. જયશંકરે રજૂ કરેલા કેન્દ્ર સરકારના પ્રયાસો વિશે વિગતવાર

નવી દિલ્હીઃ કતારમાં 8 એક્સ નેવી ઓફિસર્સને મૃત્યુદંડની સજા ફટકારવામાં આવી છે. વિદેશ પ્રધાન એસ. જયશંકરે આ નેવી ઓફિસર્સના પરિવાર સાથે રુબરુ મુલાકાત કરી છે. જયશંકરે પોતાના સોશિયલ મીડિયા હેન્ડલ પર આ જાણકારી શેર કરી છે. કતારમાં 8 ભારતીય જવાનો કેદ છે જેમના પરિવાર સાથે આજે મુલાકાત કરી. આ કેદ જવાનોની મુક્તિ માટે કેન્દ્ર સરકાર હર સંભવ પ્રયત્ન કરી રહી છે.

જયશંકરે એક્સ હેન્ડલ પર માહિતી આપીઃ એસ. જયશંકરે પોતાના એક્સ હેન્ડલ પર જણાવ્યું છે કે ભારત સરકાર આ મુદ્દાની ગંભીરતા સમજે છે. તે મુજબ જ ભારત સરકાર કાર્યકરી રહી છે. સરકાર પીડિત પરિવારના દુઃખને સમજે છે. તેમણે દરેક પરિવારને આશ્વાસન આપ્યું છે અને કહ્યું કે કેન્દ્ર સરકાર નેવી ઓફિસર્સને છોડાવવા માટે દરેક શક્ય તેટલા પ્રયત્ન કરી રહી છે. આ મુદ્દાને કેન્દ્ર સરકાર પ્રાથમિકતા આપી રહી છે. અમે દરેક લીગલ આસિસટન્સનો ઉપયોગ કરીશું. અત્યારે આ આઠ નેવીના પૂર્વ ઓફિસર્સ વિરુદ્ધ પ્રાથમિક ચુકાદો આવ્યો છે. અમે વિસ્તૃત ચુકાદાની રાહ જોઈએ છીએ અને તે મુજબ આગળની કાર્યવાહી કરીશું.

2022થી જેલમાં છે નેવી ઓફિસર્સઃ માહિતી અનુસાર ભારતીય નૌસેનાના 8 એક્સ ઓફિસર્સ કતારની જેલમાં બંધ છે. આ ઓફિસર્સ પર જાસુસીનો આરોપ લગાડવામાં આવ્યો છે. કતારની કોર્ટે આ ઓફિસર્સને મૃત્યુદંડની સજા ફટકારી છે. આ આઠ એક્સ ઓફિસર્સમાં કમાન્ડર પૂર્ણેન્દુ તિવારી પણ છે. જેમણે 2019માં તત્કાલીન રાષ્ટ્રપતિ રામનાથ કોવિંદે સન્માનિત કર્યા હતા.