ભારત અંતરિક્ષમાં બીજી છલાંગ લગાવવા માટે તૈયાર: EOS-03 નું કરશે લોન્ચિંગ

સ્વતંત્રતા દિવસ 2021ની ઉજવણી બમણી થશે. ભારત 12 ઓગસ્ટના દિવસે જીઓ ઇમેજિંગ સેટેલાઇટ જીસેટ-1 લોન્ચ કરશે. ઇંડિયન સ્પેસ રિસર્ચ ઓર્ગનાઈઝેશન (ISRO) ના શ્રીહરિકોટા સ્થિત સતીશ ધવન સ્પેસ સેન્ટરથી લોન્ચ કરવામાં આવશે.

• આ વર્ષે સ્વતંત્રતા દિવસની ઉજવણી થશે બમણી
• ભારત અવકાશમાં બીજી છલાંગ લગાવવા માટે તૈયાર
• 12 ઓગસ્ટના રોજ GSLV-F10 દ્વારા EOS-03 લોન્ચ કરશે

હૈદરાબાદ: પૃથ્વી પર નિરીક્ષણ કરનાર જીસેટ-1ને GSLV-F10 દ્વારા લોન્ચ કરવામાં આવતા જીઓ ઇમેજિંગ સેટેલાઇટ જીસેટ-1નું કોડનેમ EOS-03 રાખવામાં આવ્યું છે. ઉપગ્રહનું લોન્ચિંગ 12 ઓગસ્ટના રોજ સવારે 5:43 વાગ્યે કરવામાં આવશે.

12 ઓગસ્ટના રોજ કરવામાં આવનારો EOS-03 એક અત્યંત અદ્યતન ઉપગ્રહ છે, જે GSLV F10 વાહનની મદદથી પૃથ્વીની ભ્રમણકક્ષામાં સ્થાપિત કરવામાં આવશે. કોરોના મહામારીના કારણે આ ઉપગ્રહનું લોન્ચિંગ સ્થગિત કરવામાં આવ્યુ હતુ. અગાઉ 28 ફેબ્રુઆરી 2021ના રોજ ISROએ 18 નાના ઉપગ્રહોને પણ લોન્ચ કર્યા હતા.

જાણો શું થશે ફાયદા

• EOS-03 એક ખાસ પ્રકારનો ઉપગ્રહ છે જે એક દિવસમાં ચારથી પાંચ વખત સમગ્ર દેશની તસવીરો લઈ શકે છે. આ ચિત્રો દ્વારા જંગલ વિસ્તારો, જળાશયો, પાક વિશેની ચોક્કસ પરિસ્થિતિ જાણી શકશે. જંગલ વિસ્તાર ઘટી રહ્યો છે કે, વધી રહ્યો છે તે અંગે સચોટ માહિતી ઉપલબ્ધ થશે.
• EOS -03 પૂર અને ચક્રવાત જેવી કુદરતી આફતોનું રીઅલ-ટાઇમ મોનિટરિંગ સક્ષમ કરશે. આ હવામાનની માહિતી માટે અત્યંત ફાયદાકારક સાબિત થશે. તેના દ્વારા આગામી હવામાન સંબંધિત આપત્તિઓ વિશે મહત્વની માહિતી મેળવી શકાય છે. અગાઉથી માહિતી મેળવીને, તાત્કાલિક બચાવ અને રાહતનાં પગલાં લઈ શકાય છે.

આ પણ વાંચો:દેશના પહેલા સૌર મિશનમાં ઉત્તરાખંડનું સેન્ટર કરશે ISROની મદદ

જીસેટ-1 બાદ વધુ 2 ઉપગ્રહ કરશે લોન્ચ

જીસેટ -1 ના લોન્ચિંગ બાદ ભારત EOS-4 અથવા રીસેટ-1Aના લોન્ચિંગ પર ધ્યાન કેન્દ્રિત કરશે, જે એક રડાર ઇમેજિંગ ઉપગ્રહ છે. તે દિવસે અને રાતે તસવીરો લઇ શકે છે. સમગ્ર દિવસ દરમિયાન અને તમામ હવામાન પરિસ્થિતિઓમાં સરખી રીતે ફરવાની ક્ષમતાના આધાર પર આ ઉપગ્રહ દેશના સંરક્ષણમાં વ્યૂહાત્મક ભૂમિકા ભજવવા માટે સક્ષમ છે.