કોલકાતા:ભારતે એકતરફી મેચમાં કટ્ટર હરીફ દક્ષિણ આફ્રિકાને 243 રનના વિશાળ માર્જિનથી હરાવ્યું હતું. ટોસ જીતીને પ્રથમ બેટિંગ કરતા ભારતે નિર્ધારિત 50 ઓવરમાં 5 વિકેટ ગુમાવીને 326 રન બનાવ્યા હતા. ભારત માટે સ્ટાર બેટ્સમેન વિરાટ કોહલીએ 101 અણનમ રનની સદીની ઇનિંગ રમી હતી. આ સદી સાથે વિરાટે સચિન તેંડુલકરના 49 ODIના રેકોર્ડની બરાબરી કરી લીધી. શ્રેયસ અય્યરે પણ 77 રનની ઇનિંગ રમી હતી.
શ્રેયસ ઐય્યર અને જાડેજાનો કમાલ: આજની મેચમાં વિરાટ કોહલીએ 101 રન, શ્રેયસ ઐય્યરે 77 રન, રોહિત શર્માએ 40 રન ફટકારી દક્ષિણ આફ્રિકા સામે મજબુત સ્કોર બનાવવામાં મહત્વનું યોગદાન આપ્યું છે. જ્યારે રવિન્દ્ર જાડેજાએ અણનમ 29 રન, શુભમન ગીલે 23 રન, સૂર્યકુમાર યાદવે 22 રન જ્યારે કે.એલ.રાહુલે 8 રન નોંધાવ્યા હતા. બોલિંગની વાત કરીએ તો રવિન્દ્ર જાડેજાએ આજે 5 વિકેટ ઝડપી હતી, જ્યારે મોહમ્મદ સામી અને કુલદીપ યાદવે 2-2 જ્યારે મોહમ્મદ સિરાજે 1 વિકેટ ઝડપી હતી
ટીમ ઈન્ડિયા હજુ પણ ટૂર્નામેન્ટમાં અજેય: 327 રનના લક્ષ્યાંકનો પીછો કરવા ઉતરેલા આફ્રિકાના બેટ્સમેનો ભારતીય બોલરો સામે સરી પડ્યા હતા અને સમગ્ર ટીમ 27.1 ઓવરમાં માત્ર 83 રનના સ્કોર પર ઓલઆઉટ થઈ ગઈ હતી. અને 243 રનથી હારી ગઈ હતી. ભારત તરફથી સ્ટાર સ્પિનર રવિન્દ્ર જાડેજાએ સૌથી વધુ 5 વિકેટ લીધી હતી. મોહમ્મદ શમી અને કુલદીપ યાદવને પણ 2-2 સફળતા મળી છે. વર્લ્ડ કપ 2023માં ભારતની આ સતત 8મી જીત છે અને ટીમ ઈન્ડિયા હજુ પણ ટૂર્નામેન્ટમાં અજેય છે. ભારત હવે 12 નવેમ્બરે નેધરલેન્ડ્સ સામે અંતિમ લીગ મેચ રમશે.