ચેન્નઈ: ભારતીય અવકાશ એજન્સી આજે સાંજે તેના ચંદ્રયાન 3ને લેન્ડ કરવા પર ધ્યાન કેન્દ્રિત કરી રહી છે અને તે કોઈ પ્લાન-બી પર વિચાર કરી રહી નથી. દેશના ત્રીજા ચંદ્ર મિશન ચંદ્રયાન-3 પર એક ટોચના અધિકારીએ આ અંગે માહિતી આપી હતી. સોમનાથે IANSને જણાવ્યું કે, 'ચંદ્રયાનના લેન્ડરની તમામ સિસ્ટમ સારી રીતે કામ કરી રહી છે.
ઈસરોના અધ્યક્ષે શું કહ્યું:જો લેન્ડર સિસ્ટમમાં કોઈ સમસ્યા હશે તો લેન્ડિંગ 27 ઓગસ્ટ સુધી મોકૂફ રાખવામાં આવશે. અધિકારીએ એમ પણ કહ્યું હતું કે, '27 ઓગસ્ટે લેન્ડિંગના કિસ્સામાં નવી લેન્ડિંગ સાઇટ મૂળ મૂન લેન્ડિંગ સાઇટથી લગભગ 400 કિમી દૂર હશે. જો કે ભારતીય અંતરિક્ષ એજન્સીએ પણ ટ્વીટ કર્યું છે કે મિશન સમયસર છે.
ઈસરોનો પ્લાન B:ISROએ કહ્યું, “સિસ્ટમની નિયમિત તપાસ કરવામાં આવી રહી છે. મિશન ઓપરેશન્સ કોમ્પ્લેક્સ (MOX) ઊર્જા અને ઉત્તેજનાથી ભરેલું છે!” જો છેલ્લી મિનિટોમાં કોઈ સમસ્યા હોય તો ઈસરો માટે પ્લાન બી કામ કરશે. ISRO અનુસાર મૂન લેન્ડર તેના લેન્ડર પોઝિશન ડિટેક્શન કેમેરા- LPDC થી લેન્ડિંગ સાઇટની તસવીરો લઈ રહ્યું છે. LPDC ઈમેજીસ લેન્ડર મોડ્યુલને ઓનબોર્ડ ચંદ્ર સંદર્ભ નકશા સાથે મેચ કરીને તેની સ્થિતિ (અક્ષાંશ અને રેખાંશ) નક્કી કરવામાં મદદ કરે છે. મૂન લેન્ડરમાં અન્ય કેમેરા પણ છે જેને લેન્ડર હેઝાર્ડ ડિટેક્શન એન્ડ એવોઈડન્સ કેમેરા (LHDAC) કહેવાય છે. આ કેમેરા પથ્થરો અથવા ઊંડા ખાડાઓથી મુક્ત લેન્ડિંગ વિસ્તાર શોધવામાં મદદ કરે છે.
6.05 વાગ્યે ટચ ડાઉન: માત્ર 600 કરોડના ચંદ્રયાન-3 મિશનનો મુખ્ય ઉદ્દેશ્ય ચંદ્ર લેન્ડરને ચંદ્રની સપાટી પર સુરક્ષિત રીતે સોફ્ટ લેન્ડિંગ કરાવવાનો છે. ચંદ્રયાન-3 અવકાશયાનમાં પ્રોપલ્શન મોડ્યુલ (વજન 2,148 કિગ્રા), એક લેન્ડર (1,723.89 કિગ્રા) અને રોવર (26 કિગ્રા)નો સમાવેશ થાય છે. થોડા દિવસો પહેલા લેન્ડર પ્રોપલ્શન મોડ્યુલથી અલગ થઈ ગયું હતું અને હવે બંને અલગ-અલગ ભ્રમણકક્ષામાં ચંદ્રની પરિક્રમા કરી રહ્યા છે. ISROના જણાવ્યા અનુસાર, લેન્ડર બુધવારે સાંજે 5.45 વાગ્યે ચંદ્ર પર ઉતરવાનું શરૂ કરશે અને ટચ ડાઉન લગભગ 6.05 વાગ્યે થશે. વિક્રમ લેન્ડર જે 2019માં ચંદ્રયાન-2 મિશનનો ભાગ હતું તે ચંદ્ર પર ઉતરાણના છેલ્લા તબક્કામાં ક્રેશ થયું હતું.
(IANS)
- Chandrayaan-3: ચંદ્ર પર સોફ્ટ લેન્ડિંગ સાથે ભારત એક મોટા સ્પેસ પાવર તરીકે ઊભરી આવશે
- Chandrayaan-3 Moon Landing : લેન્ડિંગમાં હવે ગણતરીના કલાકો બાકી, જાણો અત્યાર સુધી શું થયું...
