જાણો, લીંબડી વિધાનસભા બેઠકની મહત્વની જાણકારી

ગુજરાતની 8 વિધાનસભા બેઠક માટે આજે મતદાન છે. જે પૈકી લીંબડી વિધાનસભા બેઠક માટે પણ આજે મતદાન છે. લીંબડી બેઠકની વિધાનસભાની પેટા ચૂંટણી માટે ભાજપ અને કોંગ્રેસ દ્વારા પૂરજોશમાં પ્રચાર કરવામાં આવ્યો હતો. ભાજપના પૂર્વ પ્રધાન રહેલા કિરીટસિંહ રાણા સામે કોંગ્રેસે યુવા નેતા ચેતન ખાચરને મેદાનમાં ઉતાર્યા છે. બંને ઉમેદવાર જીત મેળવવા માટે પુરી તાકાત લગાવી રહ્યા છે. ભાજપ અને કોંગ્રેસના સ્ટાર પ્રચારકોએ પણ સભાઓ ગજવી હતી.

ન્યૂઝ ડેસ્ક: ગુજરાતની 8 વિધાનસભા બેઠક માટે આજે મતદાન છે. જે પૈકી લીંબડી વિધાનસભા બેઠક માટે પણ આજે મતદાન છે. લીંબડી બેઠકની વિધાનસભાની પેટા ચૂંટણી માટે ભાજપ અને કોંગ્રેસ દ્વારા પૂરજોશમાં પ્રચાર કરવામાં આવ્યો હતો. ભાજપના પૂર્વ પ્રધાન રહેલા કિરીટસિંહ રાણા સામે કોંગ્રેસે યુવા નેતા ચેતન ખાચરને મેદાનમાં ઉતાર્યા છે. બંને ઉમેદવાર જીત મેળવવા માટે પુરી તાકાત લગાવી રહ્યા છે. ભાજપ અને કોંગ્રેસના સ્ટાર પ્રચારકોએ પણ સભાઓ ગજવી હતી.

• લીંબડી બેઠકનો ટૂંકો ઈતિહાસ

લીંબડી બેઠક પર ઉમેદવારો બદલાતા રહ્યા છે. જોકે આ બેઠક ઉપર ભાજપમાંથી સૌથી વધુ વખત કિરીટસિંહ રાણા ચૂંટણી લડી ચુકયા છે. 2012માં સૌથી વધુ મતદાન 69.89 ટકા થયું હતું. જયારે સૌથી ઓછું મતદાન 1972માં 45.52 ટકા થયું હતું. આ બેઠક પર મોટાભાગની ચૂંટણીમાં રસાકસીનો માહોલ જોવા મળ્યો છે. વર્ષ 2002માં ભાજપના કિરીટસિંહ રાણા સામે કોંગ્રેસના ભવાનભાઈ ભરવાડ અત્યાર સુધીમાં સૌથી વધુ 19 હજાર 743 મતની લીડથી જીત્યા હતા. તો સૌથી ઓછી સરસાઈ 1561 મતની વર્ષ 2012માં ભાજપના કિરીટસિંહ રાણાને કોંગ્રેસના સોમાભાઇ પટેલ સામે મળી હતી.

• લીંબડી વિધાનસભાની પેટા ચૂંટણીમાં મતદારોની સંખ્યા

આ વખતે યોજાનારી લીંબડી વિધાનસભાની પેટા ચૂંટણીમાં 420 મતદાન મથકો બનાવવામાં આવ્યા છે. જેમાં કુલ 2 લાખ 72 હજાર 81 મતદારો તેમના મતાધિકારનો ઉપયોગ કરશે. આ મતદાતાઓમાં 1 લાખ 43 હજાર 853 પુરુષ મતદાતા, 1 લાખ 28 હજાર 194 મહિલા મતદાતા અને અન્ય 4 મતદારોનો સમાવેશ થાય છે. મતદાનને લઈને ચૂંટણી તંત્ર સજ્જ છે. કોરોના મહામારીને ધ્યાનમાં રાખીને પણ જરૂરી તકેદારી પુરી કરી લેવામાં આવી છે.

લીંબડી બેઠક માટે આ વખતે મુખ્ય જંગ ભાજપના કિરીટસિંહ રાણા અને કોંગ્રેસના ચેતન ખાચર વચ્ચે છે.

• પ્રચારના મુખ્ય મુદ્દાઓ

વિધાનસભાની આ પેટા ચૂંટણીમાં ભાજપ વિકાસના મુદ્દે મેદાનમાં ઉતરી છે. જ્યારે કોંગ્રેસે ખેડૂત, અને પક્ષપલટુ ઉમેદવારને મુદ્દો બનાવી પ્રચાર કર્યો હતો. મતદારોની વાત કરવામાં આવે તો મતદારો માટે સ્થાનિક ઉમેદવાર અને સ્થાનિક સમસ્યા જેવા કે, રોડ- રસ્તા, પાણી સહિતના મુદ્દાઓ મહત્વના છે.