તેલંગાણામાં BRS ફરી સત્તામાં આવશે તો ફાર્મહાઉસથી શાસન કરશેઃ પ્રિયંકા ગાંધી

PRIYANKA GANDHI: તેલંગાણામાં 30 નવેમ્બરે યોજાનારી ચૂંટણી પહેલા તમામ પક્ષો પોતાની તમામ તાકાત લગાવી રહ્યા છે. પ્રિયંકા ગાંધી વાડ્રાએ સોમવારે કોંગ્રેસ વતી ચાર્જ સંભાળ્યો હતો. પ્રિયંકાએ ભોંગિરમાં ચૂંટણી રેલી યોજી હતી અને બીઆરએસ, બીજેપી અને ઓવૈસીની પાર્ટી પર જોરદાર નિશાન સાધ્યું હતું.

હૈદરાબાદ:કોંગ્રેસ નેતા પ્રિયંકા ગાંધી વાડ્રાએ સોમવારે મુખ્યમંત્રી કે. ચંદ્રશેખર રાવની આગેવાની હેઠળના શાસન પર આકરા પ્રહારો કર્યા હતા. તેમણે આરોપ લગાવ્યો કે BRSના તમામ 'મોટા' નેતાઓ ફાર્મ હાઉસમાં બેસીને ત્યાંથી સરકાર ચલાવે છે. પ્રિયંકાએ કહ્યું કે, BRSના શાસનમાં ગરીબો વધુ ગરીબ થઈ રહ્યા છે, જ્યારે શાસક પક્ષ વધુ અમીર થઈ રહ્યો છે.

કોંગ્રેસને મત આપવા કરી અપીલ: હૈદરાબાદના મુખ્ય શહેરથી લગભગ 50 કિલોમીટર દૂર આવેલા ભોંગિરમાં એક ચૂંટણી રેલીને સંબોધતા તેમણે આરોપ લગાવ્યો કે જો BRS ફરીથી સત્તામાં આવશે, તો સરકાર 'ફાર્મહાઉસ'થી ચાલશે અને જમીન-દારૂ માફિયા રાજ્ય પર રાજ કરશે. તેમણે કહ્યું કે તમારા માટે રોજગારની કોઈ તક ઉપલબ્ધ રહેશે નહીં. 30 નવેમ્બરે યોજાનારી વિધાનસભાની ચૂંટણી માટે લોકોને કોંગ્રેસને મત આપવા અપીલ કરતાં તેમણે પાર્ટી દ્વારા જાહેર કરાયેલી 'છ ગેરંટી'નો ઉલ્લેખ કર્યો.

પ્રિયંકા ગાંધીએ કહ્યું, 'તેલંગાણાના મોટા નેતાઓ તેમની હવેલીઓ અને ફાર્મહાઉસમાં બેસીને સરકાર ચલાવી રહ્યા છે... તેના તમામ (BRS) નેતાઓ મોટી હવેલીઓમાં બેઠા છે. તેમની તમામ નીતિઓ માત્ર મોટા ઉદ્યોગપતિઓ માટે છે. નાના વેપારીઓ, મધ્યમ વર્ગ, ગરીબ, દલિત અને આદિવાસીઓ માટે તેમની પાસે કંઈ નથી.

ભાજપ અને બીઆરએસની નીતિ વિશે કહ્યું: તેમણે કહ્યું કે 'તેલંગાણાના ગરીબ વધુ ગરીબ બની રહ્યા છે અને BRS પાર્ટી અમીર બની રહી છે.' કોંગ્રેસ નેતાએ આરોપ લગાવ્યો કે ભાજપ હોય કે બીઆરએસ, તેમની નીતિ માત્ર સત્તામાં રહેવાની અને અમીર બનવાની છે. તેમણે કહ્યું કે સંબંધિત પક્ષના નેતાઓ પણ અમીર બની જાય છે.

ઉપરથી નીચે સુધી દરેક સ્તરે ભ્રષ્ટાચાર છે:તેમણે કહ્યું કે 'જ્યારે ચૂંટણી આવે છે, ત્યારે તેઓ ચૂંટણી સંચાલન શરૂ કરે છે. તેમને શીખવવું જોઈએ કે તેલંગાણાના લોકો વેચાણ માટે નથી. તેલંગાણાના લોકોના 'સ્વપ્ન' ચકનાચૂર થઈ ગયા છે એમ કહીને તેમણે કહ્યું કે BRS સરકારમાં 'ઉપરથી નીચે સુધી દરેક સ્તરે ભ્રષ્ટાચાર છે', તેમ છતાં કલેશ્વરમ સિંચાઈ પ્રોજેક્ટ સહિતની કોઈપણ યોજના સંપૂર્ણ રીતે પૂર્ણ થઈ નથી.

ઓવૈસી પર પણ નિશાન સાધ્યું:આરોપ લગાવ્યો કે ભાજપ તેલંગાણામાં BRS સરકારને ટેકો આપે છે, જ્યારે BRS દિલ્હી સરકારને ટેકો આપે છે. તેમણે કહ્યું કે તેમના ત્રીજા મિત્ર અસદુદ્દીન ઓવૈસીના નેતૃત્વમાં AIMIM રાજ્યમાં બંનેને સમર્થન આપે છે. તેમણે કહ્યું કે, MIM અન્ય રાજ્યોમાં 40 થી 50 સીટો પર ચૂંટણી લડે છે, પરંતુ તેલંગાણામાં તે માત્ર નવ સીટો પર ઉમેદવારો ઉભા કરે છે.

ભાજપ વિશ્વની સૌથી અમીર પાર્ટી છે: પ્રિયંકાએ કહ્યું કે 'આ ત્રણેય પક્ષો એક તરફ છે અને કોંગ્રેસ બીજી તરફ છે.' કોંગ્રેસ નેતાએ દાવો કર્યો હતો કે ભાજપ વિશ્વની સૌથી અમીર પાર્ટી બની ગઈ છે અને તેણે દેશની સંપત્તિ તેના ઉદ્યોગપતિ મિત્રોને આપી દીધી છે.

આ પણ વાંચો: