આસામ-બંગાળ ચૂંટણી: બળવાના ડરથી BJPનો પ્લાન 'બી' તૈયાર

આસામ અને પશ્ચિમ બંગાળમાં ચૂંટણીના પ્રથમ બે તબક્કા માટે ઉમેદવારોની યાદી બનાવી રહેલી ભાજપમાં બળવો થવાની આશંકા સેવાઈ રહી છે. પાર્ટી તેની સાથે કાર્યવાહી કરવાની પણ તૈયારી કરી રહી છે. બન્ને રાજ્યોમાં ભાજપની ટિકિટ પર લડવા માટે એટલી અરજીઓ મળી છે કે તેમાંથી કમિટીને કોને ટિકિટ આપવી, કોને ન આપવી તે અંગે વિસામણમાં છે. તેથી જ પાર્ટી તેને માટે યોજના 'બી' પણ તૈયાર કરી છે. એટલે કે, જેમને ટિકિટ ન મળી, તેમને ક્યારે અને કેવી રીતે ખુશ અને સંતુષ્ટ રાખવા તેની પણ પાર્ટીમાં તૈયારીઓ શરૂ થઈ ગઈ છે.

• આસામ અને બંગાળમાં પ્રથમ બે તબક્કામાં ચૂંટણીઓ યોજાશે
• BJP સરકાર ટિકિટ ન મળનારને પણ ખુશ કેમ રાખવા તે માટે તૈયાર કરી રહી છે પ્લાન "બી"
• પાંચેય રાજ્યોમાં PMની રેલીની સૌથી વધુ ડિમાન્ડ

નવી દિલ્હી: જ્યાં આસામ અને બંગાળમાં પ્રથમ બે તબક્કામાં ચૂંટણીઓ યોજાવાની છે ત્યાં ભાજપે તે બેઠકો પરના ઉમેદવારોની સૂચિ લગભગ તૈયાર કરી લીધી છે અને તેને 4 માર્ચના રોજ કેન્દ્રીય ચૂંટણી સમિતિની બેઠકમાં અંતિમ મહોર મળી શકે છે. ઉમેદવારોની તપાસ માટે મંગળવારે ભાજપની બંગાળ કોર કમિટીની બેઠક મળી હતી.

ઉમેદવારો સાથે સમાધાન કરવા નથી માગતી ભાજપ

ભાજપ કોઈપણ કિંમતે યોગ્ય ઉમેદવારોની પસંદગી અંગે સમાધાન કરવા માગતી નથી અને તેથી જ પાર્ટીએ દરેક બેઠક પર 2-2 સર્વે કરાવ્યા છે. આ સર્વેક્ષણમાં પ્રત્યેક બેઠક માટે 3-3 ઉમેદવારોના નામ નક્કી કરી કેન્દ્રીય ચૂંટણી સમિતિને મોકલવામાં આવશે અને ચૂંટણી સમિતિમાં વડાપ્રધાન સહિતના તમામ વરિષ્ઠ નેતાઓ સાથે ચર્ચા કર્યા બાદ નામ નક્કી કરવામાં આવશે.પાર્ટીના અંદરના લોકોનું કહેવું છે કે, તેમાં હાલના ધારાસભ્યોના નામ પસંદ કરવામાં આવશે.

બંગાળમાં PM મોદીની 20 ચૂંટણી સભાઓ

મહત્ત્વની વાત એ છે કે, પશ્ચિમ બંગાળમાં ભાજપની સરકાર બનાવવા માટે ભાજપે પૂરી શક્તિ આપી દીધી છે. વડાપ્રધાન નરેન્દ્ર મોદી, ગૃહપ્રધાન અમિત શાહ અને પાર્ટી અધ્યક્ષ જેપી નડ્ડા માટેની રેલીની તૈયારીઓ કરવામાં આવી છે. સૂત્રોના જણાવ્યા અનુસાર, વડાપ્રધાન મોદી પશ્ચિમ બંગાળમાં 20 ચૂંટણી જાહેર સભાઓ કરશે અને આસામમાં 6 જાહેર સભાઓને સંબોધિત કરશે.

પાંચેય રાજ્યોમાં વડાપ્રધાનની રેલીની સૌથી વધુ ડિમાન્ડ

ભાજપના એક રાષ્ટ્રીય મહાસચિવે નામ ન આપવાની શરતે જણાવ્યું હતું કે, પાંચેય રાજ્યોમાં વડાપ્રધાનની રેલીની સૌથી વધુ ડિમાન્ડ છે, પરંતુ પાર્ટીનું ધ્યાન સૌથી વધુ આસામ અને પશ્ચિમ બંગાળ પર છે. હાલમાં ભાજપ કોલકાતાના બ્રિગેડ પરેડ ગ્રાઉન્ડ ખાતે 7 માર્ચે યોજાનારી વડાપ્રધાનની રેલીની તૈયારીઓ પર ધ્યાન કેન્દ્રિત કરી રહ્યું છે.