LOC પર પાકિસ્તાને કર્યુ યુદ્વવિરામનું ઉલ્લંઘન: એક મહિલાનું મોત, બે ઘાયલ

શ્રીનગર: જમ્મુ અને કાશ્મીરના તંગધાર સેક્ટરમાં નિયંત્રણ રેખા પાસે પાકિસ્તાની સેના દ્વારા યુદ્વવિરામનું ઉલ્લંઘન કરાયુ હતું. આ હુમલામાં એક મહિલાનું મોત થયુ હતું. જ્યારે બે નાગરીકો ઘાયલ થયા છે.

પોલીસ દ્વારા મળેલી જાણકારી અનુસાર પાકિસ્તાનના હુમલામાં લોકોના જાનમાલનું નુકસાન થયુ છે. ભારતીય સેનાએ નિયંત્રણ રેખા ઉપર જડબાતોડ જવાબ આપ્યો છે. પરંતુ, આ હુમલામાં હમીદા ફાતિમા નામની મહિલાનું મોત થયુ છે.

શનિવારે તંગધાર સેક્ટરમાં પાકિસ્તાની સેનાના ગોળીબારની આડમાં આતંકવાદીઓએ ઘુસણખોરી કરવાની કોશિશ કરી હતી. શનિવારે થયેલા હુમલામાં ભારતના બે સૈનિકો અને એક નાગરિકનું મોત થયુ હતું તેમજ ત્રણ લોકો ઘાયલ થયા હતાં.

રવિવારે સેના પ્રમુખ જનરલ બિપિન રાવતે કહ્યું હતું કે, ભારતીય સેના દ્વારા કરવામાં આવેલી જવાબી કાર્યવાહીમાં 6 થી 10 પાકિસ્તાની સૈનિકો અને ત્રણ આતંકી કેંપોને નષ્ટ કરી દેવાયા હતાં.