કોરોના અપડેટ: ભારતમાં છેલ્લા 24 કલાકમાં 1,334 નવા કેસ, 27ના મોતઃ આરોગ્ય મંત્રાલય

આરોગ્ય વિભાગે માહિતી આપી છે કે, દેશમાં કોરોના પોઝિટિવ દર્દીઓની સંખ્યા વધીને 15712 થઈ છે. અત્યાર સુધી 2231 લોકો સ્વસ્થ થયા છે. કોરોનાથી મૃત્યુઆંક વધીને 507 થયો છે. છેલ્લા 24 કલાકમાં 27 લોકોના કોરોના વાઇરસથી મોત થયાં છે.

નવી દિલ્હીઃ દેશમાં કોરોના વાઇરસના ફેલાવાને રોકવા માટે 3 મે સુધી લોકડાઉન જાહેર કરાયું છે. આ સમય દરમિયાન લોકોને ઘરોમાં રોકાવાની અપીલ કરવામાં આવી છે. દેશનું આરોગ્ય મંત્રાલય અને અન્ય સરકારી વિભાગો કોરોના વાયરસ (કોવિડ 19)ના વધી રહેલા કેસો પર સતત નજર રાખી રહ્યાં છે.

આજે રવિવારે આરોગ્ય મંત્રાલય, ગૃહ મંત્રાલય અને ભારતીય તબીબી સંશોધન સંસ્થાએ સંયુક્ત પ્રેસ કોન્ફરન્સ યોજી હતી. આ સમય દરમિયાન ગૃહ મંત્રાલયે કહ્યું હતું કે, દેશમાં લોકડાઉનનું સખ્તપણે પાલન થવું જોઈએ. આરોગ્ય મંત્રાલયે માહિતી આપી હતી કે, છેલ્લાં 14 દિવસમાં 23 રાજ્યોના 54 જિલ્લામાં કોરોના વાઇરસનો એક પણ કેસ નોંધાયો નથી.

આરોગ્ય મંત્રાલયના સંયુક્ત સચિવ લવ અગ્રવાલે માહિતી આપી હતી કે, દેશમાં અત્યાર સુધીમાં કોરોનાના 15,712 કેસ નોંધાયા છે. 24 કલાકમાં દેશમાં કોરોનાના 1334 નવા કેસ સામે આવ્યાં છે. દેશમાં 507 લોકોનાં મોત થયાં છે. 2231 દર્દીઓ સાજા થયા છે.

આરોગ્ય મંત્રાલયે કહ્યું કે, 20 એપ્રિલથી દેશના કોરોના હોટસ્પોટ વિસ્તારોમાં રાહત થશે નહીં. આ સમય દરમ્યાન લોકડાઉનનું સખ્તપણે પાલન કરવું આવશ્યક છે. રસી અને ડ્રગ પરીક્ષણના સંબંધમાં હાઇલેવલના ટાસ્ક ફોર્સની રચના કરવામાં આવી છે.