જમ્મુ-કાશ્મીર મુદ્દે સુપ્રીમ કોર્ટમાં સુનાવણી, બે સપ્તાહમાં રિપોર્ટ આપવા કેન્દ્રને આદેશ

નવી દિલ્હીઃ જમ્મુ-કાશ્મીરમાંથી 370 કલમ હટાવવાના સરકારના નિર્ણય પછી સુપ્રીમ કોર્ટમાં 8 અરજીઓ થઈ હતી. આ અરજીઓ સંદર્ભે આજે કોર્ટમાં સુનાવણી થઈ હતી. બે સપ્તાહમાં જમ્મુ-કાશ્મીરની સ્થિતિ અંગે રિપોર્ટ આપવા વડી અદાલતે કેન્દ્ર સરકારને આદેશ આપ્યો છે.

મુખ્ય ન્યાયમૂર્તિ રંજન ગોગોઈ, ન્યાયાધીશ એસ.એ.બોબડે, એસ.એ.નજીરની બેંચે કહ્યુ હતું કે જો કાશ્મીરમાં બંધ હોય તો તે અંગે જમ્મુ-કાશ્મીરની કોર્ટ નિર્ણય કરશે.

કેન્દ્ર સરકારે વરિષ્ઠતમ અદાલતમાં જવાબ રજૂ કર્યો હતો

• કાશ્મીરના તમામ વર્તમાનપત્ર છપાઈ રહ્યા છે. સરકાર બની શકે તેટલી મદદ કરી રહી છે.
• પ્રતિબંધિત વિસ્તારમાં પહોંચવા માટે મીડિયાકર્મીઓને કર્ફ્યુ પાસ અપાયા છે. પત્રકારોને ફોન અને ઈન્ટરનેટની સુવિધા પણ મળી રહી છે.
• દુરદર્શન, ખાનગી ચેનલો અને રેડિયો રાબેતા મુજબ ચાલી રહ્યા છે.
• એક પણ ગોળી ચલાવાઈ નથી. માત્ર થોડા સ્થાનિક પ્રતિબંધ મુકાયા છે.
• કાશ્મીરના 88 ટકાથી વધારે પોલીસ મથકના હદવિસ્તારોમાંથી પ્રતિબંધ દુર કરાયા છે

વડી અદાલતની ટિપ્પણીઓ

• જમ્મુ-કાશ્મીરમાં જનજીવન સામાન્ય કરવુ, કલ્યાણકારી યોજનાઓ લોકો સુધી પહોંચાડવી, શાળા અને કૉલેજ નિયમિતપણે ચલાવવા
• રાષ્ટ્રહિતને ધ્યાનમાં રાખીને પ્રતિબંધ હટાવવા
• જો કાશ્મીરમાં કથિત રીતે બંધ હોય તો તે અંગે જમ્મુ-કાશ્મીર કોર્ટ નિર્ણય લેશે

સર્વોચ્ચ અદાલતે કેન્દ્ર સરકાર પાસે બે સપ્તાહમાં જમ્મુ-કાશ્મીરની સ્થિતિ અંગે અહેવાલ રજૂ કરવા આદેશ આપ્યો છે.