લોકસભા સ્પેશિયલ: અમુક એવી બેઠકો, જ્યાં રાષ્ટ્રીય પાર્ટીઓ પર ભારે પડશે સ્થાનિક પાર્ટીઓ

ન્યૂઝ ડેસ્ક: ભારતમાં લગભગ 11 એવા જીલ્લાઓ છે જે નક્સલ પ્રભાવિત છે. આ જીલ્લાઓમાં લગભગ 39 સંસદીય સીટો આવેલી છે. એક અનુમાન મુજબ જોઈએ તો 40 સીટ એવી છે જ્યાં સ્થાનિક પાર્ટીઓનો દબદબો રહેશે. છત્તીસગઢ અને પશ્ચિમ બંગાળને છોડી આ વિસ્તારોમાં સ્થાનિક પાર્ટીઓ રાષ્ટ્રીય પાર્ટીઓને હંફાવી દેશે.

છત્તીસગઢના નક્સલ પ્રભાવિત વિસ્તારોમાં ગત 6 લોકસભા ચૂંટણીઓમાં ભાજપ અને કોંગ્રેસ વચ્ચે ટક્કર રહી હતી. તો પશ્ચિમ બંગાળમાં માકપા અને તૃણમૂલનો પ્રભાવ રહેલો છે.

ભાજપનું જોર યથાવત
જો વાત કરીએ વિતેલી 6 લોકસભા ચૂંટણીની તો છત્તીસગઢમાં રાજનંદગામ, મહાસમુંદ, બસ્તર, કાંકેર સીટ નક્સલ પ્રભાવિત રહી છે. બસ્તર અને કાંકેરમાં તો 1998થી ભાજપની સત્તા કાયમ થયેલી છે.

કોંગ્રેસનો ગઢ હતી આ સીટ
આ સીટ પહેલા કોંગ્રેસનો ગઢ હતી, જ્યારે 1998 અને 2007ની પેટાચૂંટણીને છોડી આ સીટો ભાજપના ખાતામાં આવી ગઈ હતી.

તૃણમૂલ કોંગ્રેસ તથા માકપાનો દબદબો
તો આ બાજું પશ્ચિમ બંગાળમાં નક્સલ પ્રભાવિત ઝાડગ્રામ સીટ 2014માં તૃણમૂલ કોંગ્રેસ અને 2009માં માકપાએ જીતી હતી. મિદનાપુર અને બાંકુરા સીટ 1996થી 2009 સુધી માકપાના કબ્જામાં હતી અને 2014ની ચૂંટણીમાં આ બંને સીટો તૃણમૂલ કોંગ્રેસના ખાતામાં જતી રહી. પુરુલિયા પણ 2014માં તૃણમૂલ કોંગ્રેસ જીતી હતી.

1/3 સીટો પર ભાજપનો પ્રભાવ
2014માં ભાજપ નક્સલ પ્રભાવિત વિસ્તારોની સીટ પર એક તૃતિયાંશ જેટસો પ્રભાવ ઊભો કરવામાં સફળ રહ્યા હતા. ઝારખંડના ચતરા, પલામૂ જેવી નક્સલ પ્રભાવિત સીટો પર ઝામુમો, રાજદ જેવી સ્થાનિક પાર્ટીઓનો પ્રભાવ રહ્યો હતો. ખૂંટી, ગિરિડીહ, ધનબાદ અને રાંચી સીટ પર ભાજપે પોતાનો પ્રભાવ જાળવી રાખ્યો હતો જો કે, સ્થાનિક પાર્ટીઓ સાથેની તેમની ટક્કર ઓછી નહોતી.

બિહારની સ્થાનિક પાર્ટીઓનું વર્ચસ્વ
બિહારમાં નક્સલ પ્રભાવિત સીટમાં જમુઈ, જહાનાબાદ, મુંગેર, બાંકા, વૈશાલી અને મુઝફ્ફરપુર સીટ પર વિતેલી 6 ચૂંટણીઓમાં જદયુ, રાજદ, લોજપા જેવી પાર્ટીઓનો દબદબો રહેલો હતો.

તેલંગણામાં પણ સ્થાનિક પાર્ટીઓનો પ્રભાવ
કેરળમાં જોઈએ તો પલક્કડ સીટ પર 1996થી 2014 સુધી લોકસભા ચૂંટણીમાં માકપાએ જીત નોંધાવી હતી તો તેલંગણાની આદિલાબાદ પર વિતેલી પાંચ ચૂંટણીઓમાં TDPનો કબ્જો રહેલો છે. ખમ્મમ સીટ પર YSR કોંગ્રેસ તથા તેદેપાએ કોંગ્રેસને બરાબરની ટક્કર આપી હતી તો વારંગલ સીટ પર 2014માં TRS તથા 2009માં કોંગ્રેસે જીત નોંઘાવી હતી.

આંધ્રપ્રદેશમાં TDPનો પ્રભાવ
આંધ્રપ્રદેશમાં રાજમંદૂરી, ગુંટુર તથા શ્રીકાકુલમ સીટ પર ગત અમુક ચૂંટણીઓમાં TDPનો પ્રભાવ જોરદાર રહ્યો છે.

મધ્યપ્રદેશમાં ભાજપનો દબદબો રહ્યો છે.
મધ્યપ્રદેશની નક્સલ પ્રભાવિત સીટ બાલાઘાટ તથા મહારાષ્ટ્રની ચંદ્રપુર પર ભાજપે હાથ જમાવી રાખ્યો છે.

ઉત્તરપ્રદેશમાં સ્થાનિક પાર્ટીઓ કિંગ મેકર રહી છે.
ઉત્તરપ્રદેશમાં મિર્ઝાપુર સીટ પર મોટા ભાગે સ્થાનિક પાર્ટીનો જ કબ્જો રહ્યો છે. નક્સલવાડી આંદોલન બાદ ઝારખંડ, મધ્યપ્રદેશ, છત્તીસગઢ, ઓડિશા, તેલંગણા, પશ્ચિમ બંગાળ, બિહાર, મહારાષ્ટ્ર, આંધ્રપ્રદેશ, ઉત્તરપ્રદેશ જેવા 11 રાજ્યોમાં કમ્યુનિસ્ટ પાર્ટીનો દબદબો રહ્યો છે.