PM મોદી આજે વીડિયો કોન્ફરન્સથી તમામ રાજ્યના મુખ્યપ્રધાન સાથે કરશે ચર્ચા

વડાપ્રધાન મોદી કોરોના વાઈરસ અંગે તમામ રાજ્યોના મુખ્યપ્રધાનો સાથે વીડિયો કોન્ફરન્સથી વાત કરશે. જેમાં લોકહિત માટે કેવી વ્યવસ્થા કરી શકાય તે અંગે ચર્ચા થશે.

નવી દિલ્હીઃ વડાપ્રધાન મોદી કોરોના વાઈરસની વર્તમાન સ્થિતિનો તાગ મેળવવા માટે ગુરુવારે એટલે કે આજે તમામ રાજ્યના મુખ્યપ્રધાનો સાથે વીડિયો કોન્ફરન્સથી વાત કરશે. નોંધનીય છે કે, વડાપ્રધાને 20 માર્ચે રાજ્યના મુખ્યપ્રધાન સાથે વીડિયો કોન્ફરન્સથી વાત કરી હતી. જેમાં તેમણે કોરોના વાઈરસ અંગેની માહિતી મેળવી હતી.

આ સમય દરમિયાન, વડાપ્રધાન મોદીએ રાજ્યોમાં કોરોના વાઈરસ સામે લડત આપવા માટે કરાયેલી તૈયારી અંગેની માહિતી મેળવી હતી, ત્યારે તેમની સાથે કેન્દ્રીય આરોગ્ય પ્રધાન ડો. હર્ષવર્ધન અને આરોગ્ય મંત્રાલયના ઘણા અન્ય અધિકારીઓ પણ હતાં. નોંધનીય છે કે, વડાપ્રધાન મોદીએ તાજેતરમાં કોરોના વાઈરસ અંગે લોકોને જાગૃત કરવા માટે વીડિયો કોન્ફરન્સથી પ્રિન્ટ મીડિયા, ઇલેક્ટ્રોનિક મીડિયા અને રેડિયો જોકી સાથે વાત કરી હતી.

આ ઉપરાંત તેઓ સોશિયલ મીડિયા પર એક્ટિવ રહીને ટ્વિટરમાં આયુષ મંત્રાલયનો ફિટ રહેવાના માટેનો પ્રોટોકોલ શેર કર્યો હતો. જેમાં તેમણે લોકોને ગરમ પાણી પીવાની સલાહ આપી હતી. આ ઉપરાંત તેમણે પ્રોટોકોલ પર નજર રાખવા અને તેને તેમના જીવનનો એક ભાગ બનાવવા અને અન્ય લોકો સાથે શેર કરવા વિનંતી કરી હતી.

ઉલ્લેખનીય છે કે, તાજેતરમાં જ આયુષ મંત્રાલય પ્રોટોકોલ સાથે બહાર આવ્યું છે. જેમાં સ્વાસ્થ્ય તેમજ રોગ પ્રતિકારક શક્તિમાં સુધારો કરવા સરળતાથી કરી શકાય તેવી બાબતોની સૂચિ છે.