4 કલાક બરફમાં ચાલી સેનાના જવાનોએ ગર્ભવતી મહિલાને હોસ્પિટલ પહોંચાડી, PM મોદીએ કરી પ્રશંસા

શ્રીનગરઃ જમ્મુ-કાશ્મીરમાં સેનાના જવાનોએ એકવાર ફરી પોતાની તાકાત અને પરાક્રમનો પરિચય આપ્યો છે. સેનાના જવાનોએ ચાર કલાક સુધી કમર સુધીના બરફમાં ચાલી એક ગર્ભવતી મહિલાની મદદ કરી હતી. આ વીડિયો શેર કરતા વડાપ્રધાન મોદીએ જવાનોની પ્રશંસા કરી હતી.

જમ્મુ-કાશ્મીરમાં ભારે બરફવર્ષા થઈ રહી છે. જેના કારણે જનજીવન પ્રભાવિત થયુ છે. બરફ જામી જવાથી કેટલાય લોકો ફસાઈ રહ્યાં છે. તેમના રક્ષણ માટે સેના તૈયાર જ હોય છે. થોડા દિવસ અગાઉ સેનાના 100 સૈનિકો ગર્ભવતી મહિલાને હોસ્પિટલ લઈ ગયા હતા. આ જવાન મહિલાને હોસ્પિટલ પહોંચાડવા માટે કલાકો સુધી તેને ઉઠાવીને બરફમાં ચાલ્યા હતાં. વડાપ્રધાન મોદીએ આ માટે સેનાની પ્રશંસા કરી છે.

વડાપ્રધાન મોદીએ એક વીડિયો ટ્વીટ કરી સેનાને શુભેચ્છા પાઠવતા કહ્યું કે, 'આપણી સેના વીરતા અને માનવતા માટે ઓળખાય છે. લોકોને જ્યારે પણ જરૂર પડે સેના દરેક સંભંવિત મદદ કરે છે. આપણી સેના પર ગર્વ છે.'

ઈન્ડિયન આર્મીના ચિનાર કૉર્પ્સે એક ટ્વીટ થકી આ માહિતી આપી હતી. સેનાના જવાનોનો મહિલા સાથેનો વીડિયો રજૂ કરતા લખ્યું કે, ભારે બરફવર્ષા વચ્ચે એક ગર્ભવતી મહિલા શમીમાને હોસ્પિટલ જવાની જરૂર હતી. આ દરમિયાન સેનાના 100થી વધારે સૈનિકો અને 30 સામાન્ય નાગરિક 4 કલાક સુધી શમીમા સાથે ચાલતા રહ્યાં હતાં. શમીમાને સ્ટ્રેચર પર લઈ જવાઇ હતી. શમીમાએ હોસ્પિટલમાં બાળકને જન્મ આપ્યો છે, હાલ બાળક અને માતા બંને સ્વસ્થ છે.