નરેન્દ્ર મોદીએ આર્થિક પેકેજના કોરા કાગળ આપ્યા, બાકીના પેજ નિર્મલા સિતારમન ભરશે: પી ચિદમ્બરમ

વડાપ્રધાન મોદીએ મંગળવારે 20 લાખ કરોડના વિશેષ આર્થિક પેકેજની જાહેરાત કરી હતી. આ અંગે પ્રતિક્રિયા આપતા પૂર્વ નાણા પ્રધાન પી ચિદમ્બરમે કહ્યું કે, વડાપ્રધાને માત્ર હેડલાઈન અને સાદા કાગળ આપ્યા છે, જે નાણાં પ્રધાન નિર્મલા સીતારમન ભરશે.

નવી દિલ્હી: વડાપ્રધાન નરેન્દ્ર મોદીએ કોરોના સંકટ વચ્ચે મંગળવારે દેશને સંબોધન કર્યું હતું. સંબોધન દરમિયાન વડાપ્રધાન મોદીએ 20 લાખ કરોડના વિશેષ આર્થિક પેકેજની જાહેરાત કરી છે. દેશમાં કોરોના વાઈરસ સાથે કામ કરવા માટે 17 મે સુધી લોકડાઉન લંબાવવામાં આવ્યું છે.

આ અંગે પ્રતિક્રિયા આપતા પૂર્વ નાણાં પ્રધાન પી ચિદમ્બરમે કહ્યું કે, વડાપ્રધાને માત્ર એક મથાળા અને સાદો કાગળ આપ્યો છે. આજે નાણાંપ્રધાન નિર્મલા સીતારમન આ સાદા કાગળ ભરશે.

પી ચિદમ્બરમે કહ્યું કે, તેઓ સરકાર વતી અર્થવ્યવસ્થામાં લાદવામાં આવેલા દરેક રૂપિયાનો હિસાબ રાખશે. કોને શું મળી રહ્યું છે, તે વિશે પણ ખાસ કાળજી લેવામાં આવશે. સૌ પ્રથમ તો એ જોવાનું રહેશે કે, સેંકડો કિલોમીટર ચાલીને તેમના ઘરે જવા માટે નિકળ્યા છે એ ગરીબ અને ભૂખ્યા સ્થળાંતર કરનારા મજૂરોને શું મળશે? આ પેકેજમાંથી 13 કરોડ ગરીબ પરિવારોને શું મળશે.

વડાપ્રધાન નરેન્દ્ર મોદીએ મંગળવારે કુલ 20 લાખ કરોડના આર્થિક પેકેજની જાહેરાત કરી હતી. કોરોના વાઈરસ રોગચાળાને પગલે ભારતને આત્મનિર્ભર બનાવવા માટે સ્થાનિક વ્યવસાયોને પ્રોત્સાહિત કરવાની હિમાયત કરી હતી. આ દરમિયાન દેશમાં કોરોના વાઈરસના પોઝિટિવ કેસોની સંખ્યા 74,000ને વટાવી ગઈ છે.

સમગ્ર દેશમાં કોરોના વાઈરસને કારણે અત્યાર સુધીમાં 2,300થી વધુ લોકોનાં મોત નીપજ્યાં છે, જ્યારે લગભગ 24 હજાર લોકો આ રોગથી સંપૂર્ણ રીતે સ્વસ્થ થયા છે.

કોવિડ-19 કટોકટી અંગે દેશને આપેલા ત્રીજા સંબોધનમાં મોદીએ કહ્યું કે, લોકડાઉનનો ચોથો તબક્કો પણ 18 મેથી લાગુ કરવામાં આવશે, પરંતુ તે પહેલા ત્રણ તબક્કાઓથી તદ્દન અલગ હશે. અને તેના રંગરૂપ નવા હશે.