નાવડી, નદી અને એક યોદ્વા, જે રોજ લડે છે પ્લાસ્ટિક સામેની લડત !

દેશ અને દુનિયાની ચિંતા કર્યા વગર માત્ર ગંગા નદીની ચિંતા કરતો પશ્ચિમ બંગાળનો આ માણસ રોજ પ્લાસ્ટિક સામેની લડાઈ લડી રહ્યો છે. સિંગલ યુઝ પ્લાસ્ટિક સામેની તેની લડત અજોડ છે.

ભગીરથી નદીનો આ શાંત પ્રવાહ, શિયાળાની ઋતુ અને આ ઝાકળવાળી સવાર. આ અદ્ભુત વાતાવરણ વચ્ચે એકલો માણસ. જે પોતાની નાનકડી હોડી પર સવાર થઈ ગંગા નદીની સફાઈ કરી રહ્યો છે. આ વ્યકિતનું નામ છે ગૌતમ ચંદ્ર વિશ્વાસ. જે પશ્ચિમ બંગાળમાં મુર્શિદાબાદના બરહામપુરમાં રહે છે. જેમણે 'નમામિ ગંગે' ને જ પોતાનો જીવનમંત્ર બનાવ્યો છે.

ગૌતમ વિશ્વાસ એક માછીમાર હતો. પાંચ વર્ષ પહેલામાછલી પકડતી વખતે, ગૌતમે જોયું કે પ્લાસ્ટિકના કણો તેમજ કાચ અને પ્લાસ્ટિકની બોટલો અકલ્પ્ય રીતે નદીને દૂષિત કરી રહી છે અને નુકસાન પહોંચાડી રહી છે. તેમણે નિર્ણય લેવામાં વધુ સમય લીધો ન હતો અને ત્યારથી તે ગંગા નદીને સાફ કરવાના મિશનમાં લાગ્યો છે.

તેમણે ઈટીવી ભારત સાથે વાત કરતાં કહ્યુ હતું કે “મારી આ ઉંમરે પરિશ્રમ થઈ શકતો ન હોવાથી મેં હવે માછીમારી છોડી દીધી છે. પરંતુ, હું માત્ર બેસીને રહીને નદીને પ્રદુષણ થતી જોઈ શકતો નથી. હું પ્લાસ્ટિકનો કચરો બહાર કાઢવાનો પ્રયત્ન કરું છું, "

સવારથી સાંજ સુધીમાં ગૌતમ તેની આ નાવડીમાં નદીમાંથી પ્લાસ્ટિકનો કચરો એકઠો કરી બીજી સવારે તેનો નિકાલ કરે છે.

સરકાર લાંબા સમયથી પ્લાસ્ટિક સામે અભિયાન ચલાવી રહી છે. વડાપ્રધાન મોદીએ પણ દેશવાસીઓને પ્લાસ્ટિકનો ઉપયોગ ટાળવા અપીલ કરી ચુક્યા છે. જેથી ગાંધીજીના સ્વચ્છ ભારતના સપનાને સાકાર કરી શકાય.

ગૌતમ વિશ્વાસ દેશ અને દુનિયામાં શું થઈ રહ્યુ છે તેની પરવા કર્યા વગર આ કામમાં વ્યસ્ત રહે છે. તેમની માત્ર એ કોશિસ છે કે તેઓ ગંગાને સ્વચ્છ રાખી શકે.