ભોપાલ: કમલનાથે ફ્લોર ટેસ્ટ પહેલા બળવાખોર ધારાસભ્યોને પાછા બોલાવવાની અરજી કરી છે. આ ધારાસભ્યો ભોપાલ આવી પહોંચે તે પહેલાં મુખ્યપ્રધાને રાજ્યાપાલ સાથે મુલાકાત કરીને નવો દાવ રમ્યો છે. ઉલ્લેખનિય છે કે, જ્યોતિરાદિત્ય સિંધિયાનાં ભાજપમાં સામેલ થયા બાદથી કમલનાથની સત્તા ડામાડોળ થઇ છે.
આ બધા જ ધારાસભ્યો જ્યોતિરાદિત્ય સિંધિયા જયારે ઉમેદવારીપત્ર ભરે ત્યારે ત્યારે તેમની સાથે જોડાશે. એવામાં કમલનાથની અરજી પર રાજ્યપાલે ઈમરતી દેવી, તુલસી સીલાવટ, મહેન્દ્ર સિંહ સિસોદિયા, પ્રદ્યુમ્ન સિંહ સિસોદિયા અને પ્રભુરામ ચૌધરીને પ્રધાન પદથી હટાવી દીધા છે.
જ્યોતિરાદિત્ય સિંધિયાનાં સમર્થનમાં કોંગ્રેસમાંથી ભાજપમાં ગયેલા 19 ધારાસભ્યો બેંગલુરુથી પાછા આવી રહ્યા છે. આ ધારાસભ્યોમાં કમલનાથની સરકારમાં પ્રધાન રહેલા 6 નેતા પણ છે.
ધારાસભ્યો ભોપાલ પહોંચે તે પહેલાં જ ભાજપે તૈયારીઓ શરુ કરી દીધી છે. બીજી તરફ કોંગ્રેસ હજુ પણ આ ધારાસભ્યોને મનાવવા માટે પૂરતા પ્રયત્નો કરવાની તૈયારીમાં છે. બંને પાર્ટીનાં કાર્યકર્તાઓ એરપોર્ટની બહાર ભેગા થવા લાગ્યા હોવાથી કલમ 144 લાગુ કરી દેવાની નોબત આવી છે. આ બધા જ બળવાખોર ધારાસભ્યો જ્યોતિરાદિત્ય સિંધિયાને જીતાડવા માટે વોટીંગ કરશે. આ જ ધારાસભ્યોએ કમલનાથ સરકારની ખુરશી હલાવી નાખી છે.
