કેરલમાં કોરોના વાઇરસના કારણે પ્રથમ મોત, દેશમાં કુલ આંકડો 19એ પહોંચ્યો

ભારતમાં કોરોના વાઇરસના કેસ શનિવારે વધીને 873 થયા છે. આ ઉપરાંત કોરોનાની અસરથી 19 લોકોનાં મોત થયાં છે. શનિવારે કેરલમાં કોરોનાના એક દર્દીનું મોત થયું છે.

કોચીઃ કેરલમાં કોરોના વાઇરસની અસરને કારણે મોતનો પ્રથમ કેસ સામે આવ્યો છે. કેરલ રાજ્ય સરકારે શનિવારે જણાવ્યું કે, કોચીની એક હોસ્પિટલમાં દાખલ 69 વર્ષીય કોરોના દર્દીનું મોત થયું છે. આ સાથે જ દેશમાં કોરોના વાઇરસના કારણે મારનારા લોકોની સંખ્યા 19 થઇ છે. કેરલમાં કુલ કોરોના વાઇરસ અસરગ્રસ્ત દર્દીઓની સંખ્યા વધીને 176 થઇ છે અને આ સાથે જ સૌથી વધુ અસરગ્રસ્ત દર્દીની સંખ્યામાં કેરલ બીજા નંબરે છે.

દેશમાં કોરોના અસરગ્રસ્તનો પ્રથમ કેસ કેરલમાંથી સામે આવ્યો હતો અને અહીંયા અત્યારસુધી આ અસરથી કોઈના મોતના સમાચાર નહોતા આવ્યા. આ ઉપરાંત કેરલમાં 11 કોરોના અસરગ્રસ્ત દર્દી રિકવર થઇને પોતાના ઘરે પણ ચાલ્યા ગયા છે.

કેન્દ્રીય આરોગ્ય મંત્રાલયે સવારે 9 વાગ્યે જાહેર કરેલા પોતાના તાજા આંકડામાં 2 લોકોનાં મોત અંગે માહિતી આપી છે. આ સાથે જ દેશમાં અત્યારસુધી મહારાષ્ટ્રમાં 5, ગુજરાતમાં 3, કર્ણાટકમાં 2, મધ્ય પ્રદેશમાં 2, તામિલનાડુ, બિહાર, પંજાબ, દિલ્હી, પશ્ચિમ બંગાળ, જમ્મુ-કાશ્મીર અને હિમાચલ પ્રદેશમાાં 1-1 લોકોનાં મોત થયાં છે.