ગુરુવારે ખેડૂતોની ટ્રેક્ટર રેલી, સુરક્ષા એજન્સીઓ એલર્ટ પર

સંયુક્ત કિસાન મોર્ચાએ 7 જાન્યુઆરીના રોજ ટ્રેક્ટર રેલીનું આહ્વાન આપ્યું છે. આ સ્થિતિમાં દિલ્હી બોર્ડર પર રહેલી દિલ્હી પોલીસ અને અર્ધલશ્કરી દળોને એલર્ટ કરવામાં આવ્યા છે.

નવી દિલ્હી: ખેડૂત સંઘો કૃષિ કાયદાના વિરોધમાં દેશની રાજધાનીના પૂર્વીય અને પશ્ચિમ પેરિફેરલ એક્સપ્રેસ-વે પર ગુરુવાર અને 7 જાન્યુઆરીના રોજ ટ્રેક્ટર કૂચ યોજવા જઈ રહ્યા છે. આવી સ્થિતિમાં ગુપ્તચર એજન્સીઓને દિલ્હી એનસીઆરમાં હાઈએલર્ટ પર રાખવામાં આવી છે.

7 જાન્યુઆરીની ટ્રેક્ટર રેલીના કારણે દેશની રાજધાનીની બોર્ડર પરની દિલ્હી પોલીસ અને અર્ધલશ્કરી દળોને એલર્ટ કરવામાં આવ્યા છે. આ સાથે સુરક્ષા વ્યવસ્થામાં પણ વધારો કરવામાં આવ્યો છે.

ગૃહ મંત્રાલયના વરિષ્ઠ અધિકારીએ કહ્યું કે અમને એવી માહિતી મળી છે કે કેટલાક ખેડૂતો બેરિયર પાર કરવાનો પ્રયાસ કરી શકે છે.

આંદોલનનું નેતૃત્વ કરી રહેલા સંયુક્ત કિસાન મોરચાએ ગયા અઠવાડિયે પ્રેસ ક્લબ ઓફ ઈન્ડિયા ખાતે યોજાયેલી પત્રકાર પરિષદમાં કહ્યું હતું કે, જો સરકાર માંગણીઓ નહીં સ્વીકારે તો 26 જાન્યુઆરીના રોજ ટ્રેક્ટર પરેડ દિલ્હીમાં યોજવામાં આવશે.