“હાઇ-રેઝોલ્યૂશન સાથેની તસવીરો લેવાની ક્ષમતા ધરાવતો અને ભારતીય સેનાની ક્ષમતામાં અનેકગણી વૃદ્ધિ કરનારો સેટેલાઇટ ટૂંક સમયમાં છોડવામાં આવશે,” એમ જાણકાર વર્તુળોએ ઈટીવી ભારતને જણાવ્યું હતું. “આર્મીની સંદેશ વ્યવહાર, દૂરથી નજર રાખવી, ચોકીપહેરો રાખવો અને જાણકારી એકઠી કરવા સહિતની કામગીરી માટે તેનો ઉપયોગ કરાશે. તેના કારણે અત્યાધુનિક ડ્રોન ઓપરેશન્સ પણ સરળ બનાવશે,” એમ જાણકારે પોતાનું નામ જાહેર કર્યા વિના જણાવ્યું હતું. ઉપગ્રહને કારણે સેનાનું પોતાનું સંદેશવ્યવહાર નેટવર્ક હશે, અને તે સલામત હોવાથી ગુપ્તતા જળવાઈ રહેશે. તેનું સંચાલન સિગ્નલ્સ ડિરેક્ટોરેટ હસ્તક રહેશે.
રિમોટ સેન્સિંગ અને સર્વેલન્સની ઉપગ્રહની ક્ષમતાને કારણે તે “આય ઇન ધ સ્કાય” (આકાશમાં આંખ) બની રહેશે અને પાકિસ્તામાંથી એલઓસીમાંથી ઘૂસણખોરી કરનારા ત્રાસવાદીઓ પર નજર રાખવા તથા પાકિસ્તાની સેનાની હલચલ, તેના અડ્ડા વગેરે પર પણ નજર રાખી શકાશે. સરહદ પર નજર રાખવા ઉપરાંય ઉપગ્રહની મદદથી અગત્યના લશ્કરી થાણાં અને તંગદિલીગ્રસ્ત વિસ્તારો પર પણ નજર રાખવામાં આવશે. ભારતના 55 ઉપગ્રહોમાંથી 8-10 ભારતીય સેના માટે ઉપયોગમાં આવે છે. નજીકના ભવિષ્યમાં વધુ લશ્કરી ઉપગ્રહો છોડવામાં આવશે તેમ માનવામાં આવે છે.
અત્યાર સુધીમાં ISRO તરફી 34 દેશોના 327 ઉપગ્રહો તરતા મૂકાયા છે, જેમાં સૌથી અગત્યનું મિશન હતું PSLV-C37. 15 ફેબ્રુઆરી 2017ના રોજ આ એક જ મિશનમાં એક સાથે 104 ઉપગ્રહો છોડવામાં આવ્યા હતા. ભારતે નવેમ્બર 2019માં છોડેલા કાર્ટોસેટ-3 ઉપગ્રહની એવી ક્ષમતા છે કે 500 કિમી દૂરથી પણ માત્ર 25 સેમી નાની વસ્તુની પણ અચૂક તસવીર લઈ શકે. ભારતીય ઉપગ્રહનું આ સારામાં સારું રેઝોલ્યૂશન છે. એપ્રિલ 2019માં ISROએ EMISAT ઉપગ્રહ છોડ્યો હતો, જે જમીન પરથી ટ્રાન્સમીટ થતાં કોઈ પણ સિગ્નલને પકડી શકે છે. દુશ્મને છુપાવેલા ઉપકરણો કે રડાર પણ છુપા રહી શકે નહિ. બીજો એક ઉપગ્રહ માઇક્રોસેટ R રાત્રે પણ તસવીરો લઈ શકે છે.