જુમ્માની નમાઝ પહેલાં યોગી સરકાર એક્શન મોડમાં, અનેક જિલ્લામાં ઈન્ટરનેટ સેવા બંધ

લખનૌ: નાગરિકતા સંશોધન કાયદા પર થયેલી હિંસા બાદ ઉત્તર પ્રદેશમાં સ્થિતિ ધીરે-ધીરે સામાન્ય થઈ રહી છે. પરંતુ ફરી એકવાર અનેક જિલ્લાઓમાં ઈન્ટરનેટ સેવા બંધ કરવામાં આવી છે. આજે 27 ડિસેમ્બરે જુમ્માની નમાઝ હોવાથી આ નમાઝને ધ્યાનમાં રાખીને વહીવટી તંત્ર દ્વારા સંવેદનશીલ જિલ્લાઓમાં સાવચેતીના પગલા રુપે ઈન્ટરનેટ સેવા બંધ કરવામાં આવી છે.

ઉત્તર પ્રદેશના કેટલાક જિલ્લાઓમાં ઈન્ટરનેટ સેવા બંધ કરવામાં આવી છે, જેમાં સહારનપુર, મેરઠ, આગરા, બુલંદશહેર, ગાઝિયાબાદ અને બિજનૌર સહિત 14 જિલ્લાઓનો સમાવેશ કરવામાં આવ્યો છે. અહીં 26 તારીખથી જ ઈન્ટરનેટ બંધ કરવામાં આવ્યું છે. રાજ્ય વહીવટીતંત્રે તમામ જિલ્લાના DMOને આ અંગે છૂટ આપી દીધી છે કે, જો સ્થિતિ સંવેદનશીલ હોય અને કોમી તણાવની સંભાવના હોય તો સાવચેતી રૂપે તમે તમારા વિસ્તારમાં ઈન્ટરનેટ સેવા બંધ કરી શકો છો.

• હિંસક પ્રદર્શન રોકવા સરકાર સતર્ક

પ્રશાસનના જણાવ્યા મુજબ હાલમાં સ્થિતિ સામાન્ય છે. સંવેદનશીલ વિસ્તારોમાં કલમ 144 લાગુ કરવામાં આવી છે. તેમ છતાં સાવચેતી રાખવામાં આવી રહી છે જેથી ફરીવાર હિંસા થતી અટકાવી શકાય.

ઉલ્લેખનીય છે કે, ગત શુક્રવારે પણ રાજ્યની રાજધાની લખનૌ સહિત 15 જિલ્લામાં ઈન્ટરનેટ સેવા બંધ કરવામાં આવી હતી. આ તરફ જુમ્માની નમાઝને ધ્યાનમાં રાખીને અલીગઢમાં એલર્ટ જાહેર કરવામાં આવ્યું છે. આ દરમિયાન ઈન્ટરનેટ ઉપરાંત SMS અને મેસેંજર સેવા પણ બંધ રાખવામાં આવી છે.