દિલ્હીની કોર્ટ રૂમમાં દુષ્કર્મના આરોપીએ રિપોર્ટર ઉપર કર્યો હુમલો

નવી દિલ્હી: દિલ્હીની કડકડડુમા અદાલતે વર્ષ 2013માં દિલ્હીના ગાંધીનગર વિસ્તારમાં પાંચ વર્ષની બાળકી સાથે કરવામાં આવેલા દુષ્કર્મના આરોપી મનોજ શાહ અને પ્રદીપને દોષી જાહેર કર્યા છે. આ મામલામાં અદાલત 30 જાન્યુઆરીએ સજા અંગે ચૂકાદો સંભળાવશે.

આ મામલામાં ચૂકાદો સંભળાવ્યા બાદ જ્યારે દોષિતોને કોર્ટ રૂમમાંથી બહાર લઈ જવામાં આવતા હતા. ત્યારે ત્યાં હાજર રહેલા અને વીડિયો બનાવી રહેલા પત્રકાર ઉપર દોષી મનોજે હુમલો કરવા પ્રયાસ કર્યો હતો. તેણે પત્રકારને થપ્પડ મારી અને તેનો મોબાઈલ તોડવાનો પ્રયાસ કર્યો હતો.

આ પહેલા કોર્ટે તેના ચૂકાદામાં જણાવ્યું હતું કે, પાંચ વર્ષની બાળકી સાથે દુષ્કર્મની ઘટના સમાજ માટે આંચકા રૂપ ઘટના છે. આપણા સમાજમાં સગીર બાળકીઓની દેવી તરીકે પૂજા કરવામાં આવે છે.

- શું છે દુષ્કર્મની ઘટના

આ ઘટના 15 એપ્રિલ 2013ની છે. જ્યારે ભોગ બનનાર બાળકી પાંચ વર્ષની હતી. બાળકી 15 એપ્રિલ 2013ની સાંજે લાપતા થઈ હતી અને 17 એપ્રિલ 2013ના રોજ પરત મળી આવી હતી. બાળકીને અતિગંભીર સ્થિતિમાં નવી દિલ્હીની એમ્સમાં સારવાર માટે દાખલ કરવામાં આવી હતી. હદ તો ત્યારે થઈ જ્યારે બાળકીના શરીરમાંથી ડોક્ટરને તેલની શીશી અને મીણબત્તી મળ્યા હતાં.