જમ્મુ-કાશ્મીર: ચેક પોસ્ટ પર એક શખ્સે ભાગવાનો પ્રયાસ કરતા CRPFએ કર્યું ફાયરિંગ

જમ્મુ-કાશ્મીરમાં સુરક્ષા દળોએ એક વાહન રોકવાનો ઈશારો કર્યો હતો તે દરમિયાન ડ્રાઇવરે ઘટના સ્થળેથી ભાગવાનો પ્રયાસ કર્યો હતો. જેના આધારે CRPFના જવાનોએ ભાગવાનો પ્રયાસ કરી રહેલા વ્યક્તિ ઉપર ફાયરિંગ કર્યું હતું. આ ઘટનામાં વ્યક્તિનું મોત નીપજ્યું હતું.

શ્રીનગર: જમ્મુ-કાશ્મીરના બડગામ જિલ્લામાં બુધવારે એક વ્યક્તિને સેન્ટ્રલ રિઝર્વ પોલીસ ફોર્સ (સીઆરપીએફ) ના જવાનોએ ગોળી મારી હતી, જ્યારે આ વ્યક્તિએ તેના વાહનમાંથી સુરક્ષા ચેક પોસ્ટને પાર કરવાનો પ્રયાસ કર્યો હતો. આ ઘટનામાં ગોળી વાગવાના કારણે વ્યક્તિનું મોત નીપજ્યું હતું.

એક પોલીસ અધિકારીએ જણાવ્યું હતું કે, સવારે 10.45 વાગ્યે સીઆરપીએફ નાકા પાર્ટીએ બડગામ જિલ્લાના માગમ પોલીસ સ્ટેશન હેઠળ કવુસા ખાતે વાહન અટકાવવાનો ઇશારો કર્યો હતો, પરંતુ વાહન ચાલકે ત્યાંથી ભાગવાનો પ્રયાસ કર્યો હતો .

તેમણે કહ્યું કે સીઆરપીએફના જવાનોએ ફાયરિંગ કરી હતી જેમાં વાહનનો ચાલક ઇજાગ્રસ્ત થયો હતો.

અધિકારીએ જણાવ્યું હતું કે ડ્રાઈવરની ઓળખ મખાના બિરવાહના રહેવાસી મેહરાજુદ્દીન તરીકે થઈ છે. તેને તાત્કાલિક શહેરની એસએમએચએસ હોસ્પિટલમાં ખસેડવામાં આવ્યો હતો જ્યાં તેનું મોત નીપજ્યું હતું.