શરદ પવારે મીડિયાને તેમના નિવાસસ્થાને આવવાની ના કેમ પાડી?

મુંબઈઃ મહારાષ્ટ્રમાં શિવસેના સાથે સરકારની રચના કરવા કોંગ્રેસ અને NCP વચ્ચે બેઠકોનો દોર ચાલી રહ્યો છે. આ વચ્ચે મીડિયા કવરેજથી એનસીપી પ્રમુખ શરદ પવારે નારાજગી દર્શાવી છે. તેમણે પત્રકારો સાથે વાતચીતમાં મીડિયા કવરેજ અંગે રોષ ઠાલવ્યો હતો.

મીડિયા ઉપર શરદ પવારને ગુસ્સો આવવાનું કારણ છે કે, રાષ્ટ્રવાદી કોંગ્રેસ પાર્ટીના પ્રમુખ શરદ પવારના ભત્રીજા અજીત પવારે બુધવારે બેઠક રદ થઈ હોવાની માહિતી પત્રકારોને આપી હતી. બીજી બાજુ પ્રવક્તા નવાબ મલિકે બેઠક રદ થઈ હોવાનો ઈન્કાર કર્યો હતો. બંનેના વિરોધાભાસી નિવેદનોનાં કારણે અનેક ચર્ચાઓ ઉઠી હતી.

એનસીપીના નેતા અજિત પવારે શરદ પવારના ઘરની બહાર ઉભેલા પત્રકારોને કહ્યુ હતું કે, તેઓ તેમના મતવિસ્તાર બારામતી જઈ રહ્યા છે. અજીત પવારે પત્રકારોના જવાબ આપવાનો પણ ઈન્કાર કર્યો હતો. પવારે પત્રકારોને એક જ લાઈનમાં કહી દીધું હતું કે, 'બેઠક રદ થઈ ગઈ છે. મને નથી ખબર કે હવે ક્યારે યોજાશે'

આ કવરેજ અંગે શરદ પવારે નારાજગી દર્શાવતા કહ્યુ હતું કે, જો પત્રકારો નેતાઓની અંગત જીંદગીમાં જોવાની કોશિશ કરશે તો તેઓ પત્રકારો સાથે વાત નહીં કરે.

તેમણે ઉમેર્યુ હતું કે,'અજીત પવાર મુંબઈમાં જ છે. તેઓ કાલે પત્રકારો સાથે મુલાકાત કરશે. જો તેઓ મજાકમાં પણ કંઈ કહેશે તો મીડિયા તેમનો પીછો કરશે. આ કોઈકની અંગત જીંદગીમાં માથું મારવા જેવું છે. અજીત પવારે જાણી જોઈને બારામતી જવાનું કહ્યું. જો તમે કોઈ પણ વાતને તોડી-મરોડીને રજૂ કરવાનાં હોય તો કાલથી અહીં( તેમના નિવાસસ્થાને) ન આવે'