ચીનનો આરોપ, ભારતીય સૈનિકોએ ચીનના સૈન્ય પર ઉશ્કેરણીજનક હુમલો કર્યો હતો

બેઇજિંગે નવી દિલ્હી પર ઉશ્કેરણીજનક હુમલાનો આરોપ લગાવતા કહ્યું છે કે, ભારતીય સૈનિકોએ બે વાર ગેરકાયદેસર રીતે સરહદ પાર કરી હતી, ત્યારબાદ જવાબી કાર્યવાહીમાં ભારતીય સેનાના 3 જવાન શહીદ થયા હતા.

બેઇજિંગ: લદ્દાખના ગાલવાન ખીણમાં ગઈકાલેરાત્રે ભારત-ચીની સૈનિકો વચ્ચે હિંસક અથડામણ થઈ હતી. આ અથડામણમાં ભારતના 3 જવાન શહીદ થયા હતા. આ ઘટના બાદ ચીન હવે રાજરમત રમી રહ્યું છે.

ચીને ભારતીય સેના પર આરોપ લગાવતા જણાવ્યું હતું કે, ભારતીય સૈન્ય તરફથી પહેલા હુમલો કરવામાં આવ્યો હતો. ત્યારબાદ જવાબી કાર્યવાહીમાં ભારતીય સેનાના 3 જવાન શહીદ થયા હતા.

ચીનના વિદેશ મંત્રાલયના પ્રવક્તા ઝાઓ લિજિયને કહ્યું, 15 જૂને, ભારતીય સૈનિકોએ બંને પક્ષની સંમતિનું ઉલ્લંઘન કર્યું હતું.

તેમણે 2 વાર ગેરકાયદેસર રીતે સરહદ પાર કરી હતી અને ચીનના સૈન્ય પર ઉશ્કેરણીજનક હુમલો કર્યો હતો. પરિણામે, બંને સૈનિકો વચ્ચે ભારે અથડામણ થઈ હતી.