ઓડિશાની ઝૂંપડપટ્ટીનાં બાળકો કે જે કચરામાંથી બનાવે છે, રોબોટ્સ

ભુવનેશ્વર: ઓડિશાની ખંડાગિરિ ઝૂંપડપટ્ટીના બાળકો ન તો ઇજનેર છે, ન ઇલેક્ટ્રિશિયન, ન તો એવા કોઈ પરિવારમાંથી આવે છે જ્યાં તેમને તકનીકી જ્ઞાન મળી શકે. તેમ છતાં આ બાળકોએ જે કરીને દેખાડ્યુ છે. તે ન માત્ર પ્રશંસાના પાત્ર છે પરંતુ અનુકરણીય પણ છે. આ બાળકોએ ભંગારમાંથી રોબોટ્સ બનાવીને સૌને ચોંકાવી દીધા છે. વિશ્વભરમાં પ્લાસ્ટિકના કચરાના વધતા જથ્થાને પહોંચી વળવા તેમનો ભાગ આપી રહ્યા છે.

વિશ્વ સામે મોં ફાડીને ઉભેલા પ્રદુષણની સમસ્યાને પહોંચી વળવા બાળકોનો આ નવીન અને ઉપયોગી વિચાર ખુબ ઉપયોગી સાબિત થઈ શકે છે. તેઓ આ મુખ્ય મુદ્દાને પહોંચી વળવા માટે નવીન અને ઉત્પાદક વિચાર સાથે આગળ આવ્યા છે.

આ બાળકો જે ઝૂંપડપટ્ટીમાં રહે છે તેની આસપાસના સ્થળોએ પ્લાસ્ટિક સહિતના ભંગારના ટુકડા પુષ્કળ પ્રમાણમાં મળી રહે છે. ભંગારની વચ્ચે રમતા-રમતા જ બાળકોને આ પ્લાસ્ટિક વેસ્ટનો સદ્ઉપયોગ કરવાનો વિચાર આવ્યો અને તેમને રોબોટ્સ બનાવવાનું સુઝ્યુ.

રોબોટ્સ બનાવવા માટે વપરાયેલી બોટલ, કચરો અને અન્ય ભંગારની ચીજવસ્તુનો ઉપયોગ કરે છે. જે રોબોટ્સ બનાવે છે તેનો આકાર પણ મનુષ્ય જેવો જ લાગે છે.

માત્ર રોબોટ્સ જ નહીં તેઓએ કચરા-ભંગારમાંથી વેક્યુમ કલીનર્સ પણ બનાવ્યા છે. જેને ત્યાંના આસપાસના વિસ્તારમાંજ મળ સાફ કરવામાં ઉપયોગમાં લેવાઈ છે. આ ઉપરાંત આ બાળકોએ ઓટોમેટિકલી ખુલતા દરવાજાનું એક મોડેલ પણ તૈયાર કર્યુ છે.

બાળકોના આ નવતર અભિગમથી પ્લાસ્ટિકના ભંગારને નવું જીવન મળ્યુ છે અને પર્યાવરણની જાળવણીમાં યોગદાન મળ્યુ છે.

નીતનવી વસ્તુઓ બનાવવા માટે બાળકોના હાથ હંમેશા તત્પર રહે છે. કોઈ પણ જાતના સંસાધન કે તકનીકી મદદ વગર તેમના આવિષ્કારથી જે લોકોને તકનીકી સંસાધનોની મદદ મળે છે તેમને પડકાર મળ્યો છે.

આ બાળકોએ વધુ આવિસ્કાર કરવા તકનીકી જ્ઞાન સાથે આગળ વધવાની ઇચ્છા વ્યક્ત કરી છે. પરંતુ આ આર્થિક સહાયનો અભાવ હોવાનું જણાવ્યુ હતું.

પરંતુ હવે, આ બાળકોને ભુવનેશ્વરની ઉન્મુક્ત ફાઉન્ડેશનનો ટેકો મળી રહ્યો છે. આ ફાઉન્ડેશન બાળકોની પ્રતિભા અને કુશળતા સુધારવા તેમને મફત તાલીમ આપી રહ્યુ છે.