BJP નેતા ઉમા ભારતી રામ મંદિર ભૂમિપૂજનમાં સામેલ નહીં થાય

ભાજપના દિગ્ગજ નેતા ઉમા ભારતી 5 ઓગસ્ટના રોજ રામ મંદિર ભૂમિ પૂજનમાં સામેલ થશે નહીં. તેમણે ટ્વીટ કરીને આ અંગેની માહિતી આપી છે.

અયોધ્યાઃ કોરોના વાઇરસના વધતા સંક્રમણને ધ્યાનમાં રાખીને ઉમા ભારતીએ નિર્ણય લીધો કે, તે અયોધ્યામાં ભૂમિપૂજનમાં સામેલ થશે નહીં. આ અંગે તેમણે ટ્વીટ કરીને માહિતી આપી છે. વધુમાં તેમણે જણાવ્યું કે, કાર્યક્રમ પૂર્ણ થયા બાદ તે રામલલાના દર્શન કરશે.

2 દિવસ બાદ 5 ઓગસ્ટના રોજ અયોધ્યામાં રામ મંદિરનું ભૂમિપૂજન થવાનું છે. આ દરમિયાન ભાજપના દિગ્ગજ નેતા ઉમા ભારતીએ પૂજામાં સામેલ નહીં થવાનો નિર્ણય લીધો છે. તેમણે ટ્વીટ કરીને કહ્યું કે, કાલે જ્યારે મેં અમિત શાહજી અને અન્ય નેતાઓ અંગે કોરોના પોઝિટિવના સમાચાર સાંભળ્યા, ત્યારથી જ હું કાર્યક્રમમાં હાજર નહીં રહેવા અને ખાસ કરીને વડાપ્રધાન નરેન્દ્ર મોદી માટે ચિંતિત છું.

ઉમા ભારતીએ કહ્યું કે, આ અંગે મેં રામ જન્મભૂમિ ટ્રસ્ટના વરિષ્ઠ અધિકારીઓ અને વડાપ્રધાન કાર્યાલયને 5 ઓગસ્ટના રોજ રામ મંદિર સ્થાપના કાર્યક્રમમાં આમંત્રિત મહેમાનોની યાદીમાંથી મારૂં નામ હટાવવા વિનંતી કરી છે. તેમણે વધુમાં કહ્યું કે, તે કાર્યક્રમ પૂર્ણ થયા બાદ ભગવાન રામલલાના દર્શન કરશે.

ઉમા ભારતીએ કહ્યું કે, તે રવિવારે ભોપાલથી નીકળી જશે, પરંતુ દર્શન માટે અયોધ્યા જશે નહીં. કારણ કે, ત્યાં હજારો લોકો હાજર હશે અને તે કોઈ પણ સંક્રમિત વ્યક્તિના સંપર્કમાં આવી શકે છે.