મધ્ય પ્રદેશ/ઉજ્જૈન: થોડા દિવસો પહેલા કાનપુરમાં આરોપીઓને પકડવા ગયેલી પોલીસ પર અંધાધુધ ફાયરિંગ કરાયું હતું. આ અંધાધુધ ફાયરિંગમાં 8 પોલીસકર્મીઓ શહીદ થયા હતાં. આ સમગ્ર મામલે ઉત્તર પ્રદેશ પોલીસ છેલ્લા એક અઠવાડિયાથી સક્રિય હતી. મામલે માસ્ટરમાઈન્ડ વિકાસ દુબેની મધ્યપ્રદેશના ઉજ્જૈનથી ધરપકડ કરવામાં આવી છે. મધ્યપ્રદેશના નેતા નરોતમ મિશ્રાએ ટ્વીટ કરી વિકાસની ધરપકડ થઈ હોવાની જાણકારી આપી હતી.
સુત્રો અનુસાર વિકાસની ધરપકડ યુપી પોલીસની ટીમ અને એસટીએફે કરી હતી. યુપી પોલીસે વિકાસ દુબેના વધુ બે સાથીઓને આજે એક એન્કાઉન્ટરમાં ઠાર માર્યા હતાં. વિકાસ 2 જુલાઈથી ફરાર હતો. કાનપુરમાં થયેલા હત્યાકાંડ મામલે પોલીસ મુખ્ય આરોપી વિકાસ દુબેને શોધવા માટે ઉત્તર પ્રદેશ સહિત આસપાસના રાજ્યોમાં પણ તપાસ કરી રહી હતી અને તેના પરનું ઈનામ અઢી લાખથી વધારીને પાંચ લાખ રૂપિયા કરવામાં આવ્યું હતું.
તમને જણાવી દઈએ કે, કાનપુરમાં કુખ્યાત ગેગસ્ટર વિકાસ દુબેને પકડવા ગયેલી પોલીસ ટીમ પર ફાયરિંગ કરવામાં આવ્યું હતું. જેમાં 8 પોલીસકર્મીઓ શહીદ થયા હતા. આ ફાયરિંગમાં 6 પોલીસકર્મીઓ સહિત 7 લોકો ધાયલ થયા છે. વિકાસ ઉત્તર પ્રદેશનો કુખ્યાત ગેગસ્ટર છે. હાલ મધ્ય પ્રદેશ પોલીસની કસ્ટડીમાં વિકાસ દુબેને રાખવામાં આવ્યો છે.
