રાજકીય કિન્નાખોરીમાં પ્રામાણિક અધિકારીઓનો લેવાય છે ભોગઃ 71 નિવૃત અધિકારીઓએ મોદીને લખ્યો પત્ર

નવી દિલ્હી: INX મીડિયા મામલામાં ચાર પૂર્વ અધિકારીઓ સામે તપાસ ચાલી રહી છે. જે 71 નિવૃત્ત અધિકારીઓએ ચિંતા વ્યક્ત કરી છે. મોદીને સંબોધીને લખાયેલા પત્રમાં અધિકારીઓએ કહ્યુ છે કે, આ પ્રકારની કાર્યવાહીથી પ્રમાણિક અધિકારીઓ નિરાશ છે.

મૉબ લિંચિંગ અંગે વડાપ્રધાન નરેન્દ્ર મોદીને પત્ર લખનાર 49 ફિલ્મ કલાકારોએ સામે બિહારમાં ગુનો નોંધાયો છે. તેમની સામે રાજદ્રોહનો કેસ દાખલ થયો છે. આ વચ્ચે બીજા એક પત્રએ પણ ચર્ચા જગાવી છે. સરકારના વિવિધ ખાતાઓમાં ફરજ નિભાવી ચૂકેલા 71 નિવૃત અધિકારીઓએ મોદીને પત્ર લખ્યો છે.

પત્રમાં અધિકારીઓએ કહ્યું કે, INXમીડિયા કેસમાં ચાર નિવૃત અધિકારીઓ સામે કેસ ચાલી રહ્યો છે તે અયોગ્ય છે. રાજકીય બદલાની વેરવૃતિમાં પ્રામાણિક અધિકારીઓને હેરાન થવું પડે છે. આ અધિકારીઓ પર કેસ દાખલ કરવાના ગંભીર પરિણામ આવશે. આ સાથે તેમણે કહ્યું કે, ભ્રષ્ટાચાર અંગેની સરકારની નીતિઓ અસરકારક ન હોવાથી ભ્રષ્ટાચાર વિરોધી અધિનિયમમાં ગત વર્ષે સંશોધન કરવામાં આવ્યું હતું.

આ પણ વાંચોઃ કોઈ અધિકારીની ભૂલ નથી, તો ચિદમ્બરમ જવાબદાર કેવી રીતે?: ડૉ. મનમોહન સિંહ

ઉલ્લેખનીય છે કે, સરકારે INX મીડિયામાં FIPB મંજૂરી આપવાના મામલામાં ગત મહિને CBIને સુક્ષ્મ, લઘુ અને મધ્યમ ઉધોગ મંત્રાલયના પૂર્વ સચિવ અનૂપ કે. પુજારી, નીતિ આયોગની પૂર્વ મુખ્ય અધિકારી સિંધુ ખુલ્લર, આર્થિક મામલાના વિભાગમાં પૂર્વ ઉચ્ચ સચિવ રવિન્દ્ર પ્રસાદ અને નાણામંત્રાલયમાં તત્કાલીન નિદેશક પ્રબોધ સક્સેના પર કેસ ચલાવવાની મંજૂરી આપવામાં આવી હતી.

નોંધનીય છે કે, નિવૃત્ત અધિકારીઓ દ્વારા વડાપ્રઘાન મોદીને લખેલા પત્રમાં કહેવામાં આવ્યું છે કે, પ્રામાણિક અધિકારીઓને સરકારના નીતિગત નિર્ણયોને અમલ કરવા સિવાય કોઈપણ ભૂલ વગર નિશાન બનાવ્યા છે.