Woman headless body found in Jodhpur: રાજસ્થાનમાંથી મહિલાનો માથા વગરનો મૃતદેહ મળી આવ્યો, FSLની ટીમ સ્થળ પર બોલાવાઈ

રાજસ્થાનમાં સગીર બાળકીને બળાત્કાર બાદ કોલસાની ભઠ્ઠીમાં સળગાવી દેવાનો મામલો હજુ શાંત થયો ન હતો કે જોધપુરમાં એક મહિલાની માથા વગરની લાશ મળી આવી. આથી સમગ્ર વિસ્તારમાં સનસનાટી ફેલાઈ ગઈ છે.

જોધપુર: રાજસ્થાનના જોધપુર શહેરના શાસ્ત્રીનગર પોલીસ સ્ટેશન વિસ્તારમાં રવિવારે સવારે એક મહિલાની માથા વગરની લાશ મળી આવી હતી. આ માહિતી મળતા જ સ્થળ પર લોકોના ટોળા એકઠા થવા લાગ્યા હતા. જેને બાદમાં પોલીસે માંડ માંડ હટાવી હતી. પોલીસ સ્ટેશન વિસ્તારના સેક્શન 7 નજીક રેલ્વે ટ્રેક પાસે ઝાડીઓમાં મૃતદેહ હોવાની માહિતી મળતાં સ્ટેશન ઓફિસર જોગીન્દર સિંહ ચૌધરી અને પોલીસ ટીમ ઘટનાસ્થળે પહોંચી હતી. જે બાદ એફએસએલની ટીમને પણ સ્થળ પર બોલાવવામાં આવી હતી.

મૃતદેહ બે દિવસ જૂનો:પોલીસનું કહેવું છે કે લાશ બે દિવસ જૂની હોઈ શકે છે, માથા સિવાય એક હાથ પણ ગાયબ છે. એટલા માટે હાલ મહિલાની ઓળખ કરવી શક્ય નથી. પ્રાથમિક દૃષ્ટિએ મૃતકની ઉંમર 30 થી 35 વર્ષની હોવાનું જણાય છે. એફએસએલ દ્વારા તપાસ બાદ મૃતદેહને એમડીએમ મોર્ચરીમાં મોકલવામાં આવશે. ઘટનાસ્થળે આવેલા ડીસીપી વેસ્ટ ગૌરવ યાદવે જણાવ્યું કે પાંચ ટીમો બનાવવામાં આવી છે. ડોગ સ્ક્વોડ સાથે પણ તપાસ કરવામાં આવી રહી છે. લાશ પાટા પાસે મળી આવી છે, આવી સ્થિતિમાં ટ્રેનમાંથી કપાઈ જવાની પણ આશંકા છે, પરંતુ હત્યાની વધુ આશંકા છે. એટલા માટે અમે હત્યાના એંગલથી તપાસ કરી રહ્યા છીએ.

હત્યા અને મૃતદેહ દેવાની આશંકા:પ્રાથમિક તપાસમાં એવી પણ વાત સામે આવી રહી છે કે, હત્યા કર્યા બાદ અન્ય જગ્યાએ લાશ લાવીને ફેંકી દેવામાં આવી હતી. હત્યારાએ માથું શરીરથી અલગ કરીને અહીં ફેંકી દીધું હોવાનો અંદાજ છે. કારણ કે હાલ ઘટના સ્થળેથી હત્યાના પુરાવા મળ્યા નથી.

પોલીસ ગુમ થવાના કેસોની તપાસ કરશે:મૃતદેહની ઓળખ કરવા માટે, પોલીસ ભૂતકાળમાં વિસ્તારના પોલીસ સ્ટેશનોમાં ગુમ થયેલી મહિલાઓની પણ તપાસ કરશે. તેમાંથી કેટલાને પાછા મળ્યા કે નહીં. આવી મહિલાઓ વિશે માહિતી એકઠી કરીને મૃતદેહની ઓળખ કરવાનો પ્રયાસ કરવામાં આવશે.