હિમાચલપ્રદેશમાં મંડીની બોર્ડિંગ સ્કૂલના વધુ 39 વિદ્યાર્થી પોઝિટિવ આવ્યાં, કોરોના કેસમાં સતત વધારો

દેશમાં કોરોના કેસોમાં ઘટાડાના ખબર વચ્ચે હિમાચલપ્રદેશથી સમાચાર મળી રહ્યાં છે કે ત્યાં કોરોના કેસોમાં વધારો થયો છે. ધર્મપુર ઉપમંડળમાં આવેલી એક નિવાસી શાળામાં વધુ 39 વિદ્યાર્થી કોરોના પોઝિટિવ મળ્યાં છે. પહેલાં આ શાળામાંથી 43 બાળકો અને કર્મચારીઓ પોઝિટિવ મળ્યાં હતાં. હાલમાં શાળામાં કુલ 130 વિદ્યાર્થિની-વિદ્યાર્થીઓ છે.

• હિમાચલપ્રદેશમાં વિદ્યાર્થીઓમાં કોરોનાનો વધારો
• ધર્મપુર ઉપમંડળની નિવાસી શાળાના વિદ્યાર્થીઓ બન્યાં સંક્રમિત
• વધ 39 વિદ્યાર્થીઓ કોરોના પોઝિટિવ આવતાં ચિંતા વ્યક્ત કરાઈ

મંડી: હિમાચલ પ્રદેશમાં કોરોનાના વધી રહેલાં કેસનો આંકડો ડર ઊભો કરી રહ્યો છે. આ જિલ્લો રાજ્યના મુખ્યપ્રધાન જયરામ ઠાકુરનો ગૃહ જિલ્લો છે. ધર્મપુર ઉપમંડળ સ્થિત ડો. વિજય મેમોરિયલ સિનિયર સેકન્ડરી બોર્ડિંગ સ્કૂલના વધુ 39 અને વિદ્યાર્થીઓ કોરોના પોઝિટિવ આવ્યાં છે. આ પહેલાં શાળામાં 43 બાળકો અને કર્મચારીઓ પણ પોઝિટિવ મળ્યાં હતાં. અત્યાર સુધીમાં અહીં 82 વિદ્યાર્થીઓ અને કર્મચારીઓ કોરોનાની ઝપટે ચડ્યાં છે.

આરોગ્યવિભાગ બન્યો સતર્ક

આટલી મોટી સંખ્યામાં બાળકો કોરોના પોઝિટિવ મળવાને કારણે આરોગ્યવિભાગમાં દોડધામ મચી ગઇ છે. સમગ્ર વિસ્તારને કન્ટેઇનમેન્ટ ઝોન જાહેર કરીને બધાં સંક્રમિતોને આઈસોલેટ કરી દેવાયાં છે. આ સાથે આરોગ્યવિભાગે સમગ્ર શાળાને કન્ટેઇનમેન્ટ ઝોન જાહેર કરી દીધી છે. હાલ આ નિવાસી શાળામાં કુલ વિદ્યાર્થી સંખ્યા 130 છે, જેમાં વિદ્યાર્થિની-વિદ્યાર્થીઓ બંનેનો સમાવેશ થાય છે.

એસડીએમ રાહુલ જૈનઃ નજર રાખવામાં આવી રહી છે

એસડીએમ ધર્મપુરનો ચાર્જ સંભાળતાં એસડીએમ સરકાઘાટ રાહુલ જૈને જણાવ્યું કે આખી નિવાસી શાળાને કન્ટેઇનમેન્ટ ઝોન જાહેર કરી દેવામાં આવી છે અને બાળકોને આઈસોલેટ કરવામાં આવ્યાં છે. આરોગ્યવિભાગ અને પ્રશાસન તેના પર નજર રાખી રહ્યાં છે.

બે દિવસથી 200થી વધુ નવા કોરોના પોઝિટિવ કેસ

આપને જણાવીએ કે રાજ્યમાં મંગળવારે કોરોના સંક્રમણના 263 નવા કેસ મળ્યાં છે. તો 162 દર્દી સાજા પણ થયાં છે. ચિંતાની વાત એ છે કે પ્રદેશમાં ફરી એકવાર કોરોના કેસોમાં વધારો જોવા મળી રહ્યો છે. સતત બીજા દિવસે કોરોનાના નવા 200થી વધુ કેસ સામે આવ્યાં છે. છેલ્લાં 24 કલાકમાં રાજ્યમાં બે દર્દીએ કોરોનાથી જીવ પણ ગુમાવ્યાં છે.

કુલ એક્ટિવ કેસ 1,715

હિમાચલપ્રદેશમાં અત્યાર સુધીમાં કોરોનાથી 3,639 લોકોનાં મોત નીપજ્યાં છે. તેમ જ રાજ્યભરમાં 2 લાખ 17 હજાર 403 લોકો કોરોના સંક્રમણનો ભોગ બન્યાં છે. જ્યારે 2 લાખ 12 હજાર 033 લોકોએ કોરોનાને મ્હાત આપી છે. હિમાચલમાં એક્ટિવ કેસ 1,715 થઈ ગયાં છે.

આ પણ વાંચોઃ ભારતના દબાણ બાદ આખરે UK એ કોવિશિલ્ડ વેક્સિનને આપી માન્યતા

આ પણ વાંચોઃ નિષ્ણાતોએ આપી ચેતવણી, નવેમ્બર સુધીમાં ભારતમાં આવી શકે છે કોરોનાની ત્રીજી લહેર