લોકસભામાં મહત્વના 3 બિલ પાસ, મોનસૂન સત્રમાં પ્રથમ વખત સરકારને મળ્યું વિપક્ષનું સમર્થન

આજે સોમવારથી લોકસભાના મોનસૂન સત્રના છેલ્લા સપ્તાહનો પ્રારંભ થયો હતો. સપ્તાહના પ્રથમ દિવસે સરકાર દ્વારા 3 બિલ રજૂ કરવામાં આવ્યા હતા. જે વગર ચર્ચાએ પાસ કરવામાં આવ્યા છે. જોકે, 3 બિલ પૈકી OBC અનામતને લગતા બિલને લઈને 21 દિવસમાં પ્રથમ વખત સરકારને વિપક્ષી સાંસદોનો સાથ મળ્યો હતો.

• મોનસૂન સત્રના છેલ્લા સપ્તાહનો પ્રારંભ
• લોકસભામાં 3 બિલ થયા પાસ
• 21 દિવસમાં પ્રથમ વખત સરકારને મળ્યો વિપક્ષનો સાથ

ન્યૂઝ ડેસ્ક: લોકસભાના મોનસૂન સત્રનું અંતિમ સપ્તાહ આજથી શરૂ થયું છે. જેના પ્રથમ દિવસે વિપક્ષના હોબાળા વચ્ચે વધુ 3 બિલ પાસ થયા હતા. આ 3 બિલમાં લિમિટે લાયાબિલિટી પાર્ટનરશિપ બિલ-2021, ડિપોઝિટ ઈન્શ્યોરન્સ એન્ડ ક્રેડિટ ગેરંટી કોર્પોરેશન- સંશોધિત બિલ, 2021 અને કોન્સ્ટિટ્યૂશન શેડ્યૂલ ટ્રાયબ ઓર્ડર – સંશોધિત બિલ, 2021નો સમાવેશ થાય છે.

ગુજરાતમાં 'પટેલ'ને અનામત મળવાનું મેદાન મોકળું

લોકસભામાં સરકાર દ્વારા રજૂ કરવામાં આવેલા OBC અનામત માટેના બિલ અંગે વિપક્ષી દળોએ જણાવ્યું હતું કે, તેઓ આ બિલ મુદ્દે સરકારની સાથે છે. આ સંશોધન બિલ લોકસભા અને રાજ્યસભામાં પાસ થયા બાદ રાજ્યોને અધિકાર મળશે કે તેઓ OBCની યાદીમાં પોતાની મરજી અનુસાર લિસ્ટિંગ કરી શકે. રાજ્યસભામાં બિલ પાસ થયા બાદ રાષ્ટ્રપતિની મંજૂરી મળતા આ કાયદા હેઠળ રાજ્યોને અધિકાર મળશે. આ કાયદાથી કર્ણાટકમાં લિંગાયત, ગુજરાતમાં પટેલ, હરિયાણામાં જાટ અને મહારાષ્ટ્રમાં મરાઠા આરક્ષણ શક્ય બનશે.

આ ત્રણ બિલ થયા પાસ

• લિમિટેડ લાયાબિલિટી પાર્ટનરશિપ બિલ-2021
• ડિપોઝિટ ઈન્શ્યોરન્સ એન્ડ ક્રેડિટ ગેરંટી કોર્પોરેશન-સંશોધિત બિલ, 2021
• કોન્સ્ટિટ્યૂશન શેડ્યૂલ ટ્રાયબ ઓર્ડર – સંશોધિત બિલ, 2021

પેગાસસ, કૃષિ કાયદાઓ પર ચર્ચાને લઈને વિપક્ષ અડગ

વિપક્ષી સાંસદોએ કેન્દ્ર સરકારના ચર્ચા કરાવવા વગર બિલ પાસ કરાવવાના વલણની ટીકા કરી હતી. લોકસભા અને રાજ્યસભામાં વિપક્ષ દ્વારા સતત હોબાળો કરવામાં આવી રહ્યો છે. વિપક્ષ પેગાસસ જાસૂસીકાંડ, ત્રણેય કૃષિ કાયદા અને મોંઘવારી જેવા મુદ્દાઓ પર ચર્ચા કરવાની પોતાની માગ પર અડગ છે. ત્યારે કેન્દ્ર સરકાર વિપક્ષ પર સંસદની કાર્યવાહી ન ચાલવા દેવાનો આરોપ પણ લગાવી રહી છે.