નવસારી : બીલીમોરા નજીક આતલિયા GIDCમાં એક અકસ્માત થયો, જેમાં એક આશાસ્પદ યુવકે જીવ ગુમાવ્યો છે. અહીં એક કંપનીમાં કામ કરતા સમયે યુવકને કરંટ લાગ્યો હતો. આ બનાવમાં યુવકનું ઘટનાસ્થળે મોત નીપજ્યું હતું. સમગ્ર બનાવ CCTV કેમેરામાં કેદ થયો છે. બીલીમોરા પોલીસ સ્ટેશનમાં ગુનો નોંધી તપાસ હાથ ધરી છે.
આતલિયા GIDCમાં યુવકને લાગ્યો કરંટ :બીલીમોરા નજીક આતલિયા GIDC ખાતે સ્થિત સી-ટેલ ઈન્ફ્રા પ્રાઇવેટ લિમિટેડ કંપનીમાં ગંભીર અકસ્માત સર્જાયો છે. જેમાં એક યુવકને કરંટ લાગવાની ઘટના બનતા, યુવકનું મોત નીપજ્યું છે. ગણદેવીના માંકલા ફળિયામાં રહેતા જીગ્નેશ કલ્યાણભાઈ હળપતિ, જે આ કંપનીમાં કામ કરતા હતા, મશીનમાં દાણા નાખવાની પ્રક્રિયા દરમિયાન અચાનક કરંટ લાગવાથી મશીન સાથે ચોંટી ગયા હતા.
યુવકનું ઘટનાસ્થળે મોત નીપજ્યું :આ સમગ્ર ઘટના CCTV કેમેરામાં કેદ થઈ હતી. કરંટ લાગવાથી બનેલા આ અકસ્માતને લઇ બીલીમોરા પોલીસ સ્ટેશનમાં ગુનો દાખલ કરવામાં આવ્યો છે. જેમાં અકસ્માત મોતનો ગુનો નોંધવામાં આવ્યો છે. મૃતકના પરિવારજનોએ આ દુ:ખદ ઘટનાથી શોક વ્યકત કર્યો છે અને કંપનીની સુરક્ષા વ્યવસ્થા પર પ્રશ્ન ઉઠાવ્યા છે. આ ઘટનાને પગલે કામદારોમાં પણ ભયનું વાતાવરણ સર્જાયું છે.
પોલીસ કાર્યવાહી અને તપાસ :બીલીમોરા પોલીસ સ્ટેશનના પોલીસ ઇન્સ્પેક્ટર કે. ડી. નકુમે જણાવ્યું હતું કે, બે દિવસ અગાઉ બીલીમોરા GIDC માં સી-ટેલ ઈન્ફ્રા પ્રાઇવેટ લિમિટેડ કંપનીમાં યુવકને કરંટ લાગવાની ઘટના બની હતી. ગણદેવીના માંકલા ફળિયામાં રહેતા જીગ્નેશ કલ્યાણભાઈ હળપતિ, જે આ કંપનીમાં કામ કરતા હતા, મશીનમાં દાણા નાખવાની પ્રક્રિયા દરમિયાન અચાનક કરંટ લાગવાથી મશીન સાથે ચોંટી જતા મોત થયું છે. હાલ પોલીસે અકસ્માતે મોતનો ગુનો નોંધી સમગ્ર બાબતે તપાસ આરંભી છે.
